Дзæуджыхъæуы байгом уæлæмхасæн ахуырады центр æххысцух æмæ бирæсывæллонджын бинонты сабитæн

Æххуысцух æмæ бирæсывæллонджын бинонты сабитæн фæзынд фадат паддзахадон фæлварæнтæм лæвар цæттæ кæнынæн. Дзæуджыхъæуы Паддзахадон Думæйы депутат Таймазты Артуры хъæппæрисæй горæты байгом уæлæмхасæн ахуырады центр. Фæлтæрдджын ахуыргæнджытæ кусынц сывæллæттимæ математикæ, уырыссаг æмæ англисаг æвзаг, истори æмæ æхсæнадзонынадыл. Уыимæ ма, центры ис ирон æвзаджы ахуыртæ дæр. Бæлвырддæр хабæрттæ нæ дарддæры æрмæджы. Ахæм хуызы 9-æм къласы сывæллæттæ кусынц сæ англисаг æвзаджы зонындзинæдтæ фæхуыздæр кæныныл. Иумæйаг паддзахадон фæлварæн цæмæй радтой, уый тыххæй хъуамæ хорз кæсой, стæй ма, куыд æмбæлы, афтæ дзурой фæсарæйнаг æвзагыл. Уымæн та сын æххуыс кæнынц уæлæмхасæн ахуырады центры. Анастасия Мартыновайæн англисаг æвзаг базонын у йе стырдæр бæллиц. Арæх вæййы фæсарæйнаг бæстæты. Фæнды йæ тæлмацгæнæг суæвын. Æрвылбон йæ зонындзинæдтыл кусы цалдæр сахаты. Ахæм центры руаджы йын фадат фæцис æвзагыл бæстондæрæй бакусын. Центры ахуыр кæнынц æххуысцух æмæ бирæсывæллонджын бинонты сабитæ. Ахуыргæнджытимæ фæлварæнтæм сæхи бацæттæ кæнынц лæвар. Æппæт хъæугæ уавæртæ дзы æнтыстджын куыстæн ис. Суанг ма алы кабинет дæр схуыдтой, англисаг æвзагыл цы бæстæты дзурынц, уыдоны нæмттæй. Канадæ, Мальтæ, Австрали æмæ æндæртæ. Центры ахуыртæ цæуынц къуыри дыууæ хатты. Канд фæсарæйнаг æвзæгтыл нæ кусынц, фæлæ ма математикæ, уырыссаг æвзаг, истори æмæ æхсæнадзонынадыл дæр. Ныртæккæ дзы ахуыр кæнынц 60 адæймаджы. Фæлæ фидæны ахуыргæнинæгты нымæц 150 онг фæфылдæр уыдзæн. Паддзахадон фæлварæнмæ цæттæ кæнын æмæ хъæугæ предметтæй уæлæмхасæн зонындзинæдтæ райсыны фадат сабитæн фæзынд Паддзахадон Думæйы депутат Таймазты Артуры руаджы. Центр сарæзтой йæ хъæппæрисæй. Центры ма сарæзтой ирон æвæзаджы ахуыртæ дæр. Сты лæвар. Ахуыры рæстæг сабиты зонындзинæдтæ бæрæг кæндзысты тесттæ æмæ мониторингты руаджы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv