Æппæтуæрæсеон адæмон фронты активисттæ бæрæг кодтой сывæллæтты рæвдауæндæтты уавæр

Æппæтуæрæсеон адæмон фронты активисттæ бæрæг кодтой Алагиры æмæ Æрыдоны сывæллæтты рæвдауæндæтты уæлæмхасæн бæстыхæйттæ. Æркастысты канд арæзтадтæм нæ, фæлæ ма куыд ифтонггонд сты хъæугæ кусæнгæрзтæй, уымæ дæр. Кæй зæгъын æй хъæуы, рабæрæг сты лыггæнинаг фарстатæ дæр. Адæмон фронты уæнгтæ фæнысан кодтой. Бакусын хъæуы сæ аиуварс кæныныл. Нæ уацхæссæг радзурдзæн бæлвырддæр. Дзæуджыхъæуы сывæллæтты 86-æм рæвдауæндоны ныридæгæн ис 487 хъомылгæнинаджы. Сты алы кары сабитæ. Уыдон æртæ азæй фылдæр бæллыдысты ацы арфæйаг бынаты къæсæрæй бахизынмæ. Сæ радмæ æнхъæлмæ кастысты сæ ныййарджытӕ дӕр. Ныр федералон программæ "Демография"-йы руаджы нæ республикæйы рæвдауæндæтты ма фæзынд 3 уæлæмхасæн къорды. Алы къорды дæр 18 сывæллоны. 86-æм рæвдауæндоны кæд ацы фарста аиуварс кодтой, уæддæр дзы бакусинаг хъуыддæгтæ нырма ис. Рæвдауæндæтты кæртыты нæй аууон бынæттæ. Уымæ гæсгæ сывæллæтты хур бон кæртмæ ракæнæн нæй. Республикæйы ахуырады управленийы сæргълæууæг Дзлиаты Альбинæ зæрдæ бавæрдта, кæй сæм фæкæсдзысты, уымæй. Алагиры æмæ Æрыдоны районы ног арæзт уæттæм бæстонæй æркастысты Æппæтуæрæсеон адæмон фронты минæвæрттæ. Ам сæ уавæр йæ хæрзтæй нæу. Зæгъæм, Æрыдоны 5-æм рæвдауæндоны ног бæстыхай ивгъуыд аз апрелы сарæзтой, фæлæ дзы нырма нæ пайда кæнынц. Арæзтадтæ иуылдæр сты æмхуызон, ис дзы æртæ къордæн уæттæ, хъазæн агъуыстытæ, дзаумæттæ ивæн бынат, хуыссæнуат. Æххæст сты алцæмæйдæр. Алагиры 7-æм рæвдауæндоны кусджыты ныхæстæм гæсгæ, дзы æрмæстдæр нæ фаг кæны сабиты хъӕлдзӕг ныхас. Сæ радмæ æнхъæлмæ кæсынц 30 сывæллонæй фылдæр. Алагиры 4-æм скъолайы зæххы хайы цы ног арæзтад ис, уый æххæст у алы хуызы дæр. Хъазæн фæзты ис сæрмагонд уæлцъар, ис дзы бадæн банæттæ, ис дзы, змисæй кæм хъазой, ахæм фæзуат. Фæлæ аразджытæ куыд зæгъынц, афтæмæй нæ аиуварс кодтой зынхуыссынгæнæн системæйы хъæндзинæдтæ. Национ проект «Демография» æхæстгонд цæуы ивгъуыд азæй нырмæ. Йе 'руаджы рæвдауæндæтты фæзындзæн фылдæр бынæттæ æмæ, рады чи лæууы, уыцы адæмы нымæц цыбыр рæстæгмæ фæкъаддæр уыдзæн. Æппæтуæрæсеон адæмон фронты минæвæрттæм разынд фиппаинæгтæ. Фæнысан сæ кодтой, æмæ сыл фидæны бакусдзысты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv