Цæгат Ирыстоны дарддæр æххæст кæнынц социалон ахадындзинад кæмæн ис, ахæм программæ

Республикæйы æххуыс кæнынц, цымыдисаг проекттæ кæмæ ис, фæлæ сæ цардмӕ рахæссын къух кæмæн нæ амоны, ахæм курдиатджын адæмæн. Уый у «Мæгуырдзинадимæ тохы» программæйы къабæзтæй иу. Афтæ, февралæй нырмæ Мæздæджы районы паддзахадон æххуысӕй хи куыстуæттæ байгом кодтой 10 бинонтæ. Цы хуызы ис курдиат бадæттæн, уый тыххæй нæ дарддæры æрмæджы. Анна Ивановайы йæ куклатæн къабатæ хуыйын райдыдта, саби ма куы уыди, уæд. Фæстæдæр та йæ цард сбаста хуыйæджы дæсныйадимæ. Искæй бæрны кусын йæ бон бирæ рæстæг не сси. Фæндыд æй хи куыстуат байгом кæнын, фæлæ йын фадат нæ уыд. Æрæджы чызг базыдта «Мæгуырдзинадимæ тохы» программæйы тыххæй. Хи куыстуат байгом кæнынæн уал хъæуы курдиат бадæттын. Ахсджиаг у цæмæй проектæн уа стыр социалон ахадындзинад. Аннæ уыцы хъуыддаджы дызæрдыг никуы кодта. Юлия Баталовайы кæдфæнды дæр фæндыд сфæлдыстадон куыст кæнын. Зæрдæмæдзæугæ дæсныйад бирæ агуырдта. Ныр æй ссардта. Чызг сывæллæттæн аразы бæрæгбæттæ æмæ ирхæфсæн мадзæлттæ. Кæй зæгъын æй хъæуы йæ архайдмæ пандемийæ йæ кæнон бахаста. Ныр та ногæй курдиаттæ сарæх сты. Уый хыгъд чызг сфæнд кодта йæ авналæнтæ фæуæрæхдæр кæнын. «Мæгуырдзинадимæ тохы» программæйы архайæг цæмæй суай, уый тыххæй бацæуын хъæуы районы цæрджыты лæггæдтæ исæн центрмæ. Уым специалисттæ радзурынц программæйы æууæлты тыххæй. Хъæугæ информаци фехъусын кæнынц дзыллон информацион фæрæзтæн дæр. Уымæй уæлдай ма центры кусджытæ бæрæг кæнынц æххуысцух бинонтæ æмæ сын радзурынц проекты куыд ис бацархайæн, уый тыххæй. Программæйы руаджы февралæй Мæздæджы районы 10 бинонтæ байгом кодтой хи куыстуат. Сылгоймаджы дзаумæттæ хуыйынæй райдай æмæ куклатæ кæнынæй фæуы. Центры кусджыты ныхæстæм гæсгæ йæхи «Мæгуырдзинадимæ тохы» программæйы бафæлварын кæй фæнды, уыдоны нымæц фылдæрæй-фылдæр кæны. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv