Уæрæсейы бæрæг кæнынц тагъд медицинон æххуысы станцæйы кусæджы бон

Сæ куысты сæйраг нысан – адæймаджы цард бахъахъхъæнын. Абон Уæрæсейы бæрæг кæнынц тагъд медицинон æххуысы кусджыты профессионалон бон. Бæрæгбон сæрмагондæй снысан кодтой ивгъуыд азы. Ацы къабазы специалисттæ коронавирусимæ тохы фыццæгты 'хсæн уыдысты. Сæхимæ райстой уæззаудæр хæс. Дохтырты, фелсырты æмæ шофырты фыдæбонæн аргъ скæнæн нæй. Йæ дæсныйадыл æнувыд чи, уыдоны тыххæй нæ дарддæры æрмæг. Кочиты Давид ахуыр кæны медицинон академийы æхсæзæм курсы. Практикæ ахуыримæ баиу кæнын æй фæндыд рагæй. Цыппæрæм курсы йын ахæм фадат фæзынд. Кусын райдыдта тагъд медицинон æххуысы станцæйы. Цы дæсныйад равзæрста, ууыл æвзонг специалист никуы фæдызæрдыг. Зоны, дохтыр цавæр миниуджытæй æххæст хъуамæ уа, уый дæр. Ацы миниуджытæ дохтыртæн баххуыс кодтой, коронавирусы инфекци йæ тыхы куы бацыд уæд. Уæд-иу тагъд æххуысы станцæмæ иу бонмæ æрбацыд мин æмæ 500 курдиатæй фылдæр. Адæм уæд фæтарстысты, дохтыртæ та архайдтой хъæугæ информаци раттыныл æмæ, сæ авналæнтæм гæсгæ, баххуыс кæныныл. Ныр сæхæдæг дæр сæттынц, уыд ахæм рæстæг, æмæ сæхи дæр тас куы бацыд. Райдианы нæм уыд 15 бригады, уый фæстæ, хицауады бардзырдмæ гæсгæ, сæ нымæц 45 схызт. Дохтыртæн æххуысмæ уæд рацыдысты сæдæгай бархионтæ æмæ студенттæ-медиктæ. Сæ архайд уыд ахсджиаг æмæ хъæугæ. Уыдоны фæрцы нæ куыст фæрогдæр. Ныртæккæ сæ фылдæр дарддæр дæр кусынц тагъд æххуысы станцæйы. Æппæты зындæр рæстæг ивгъуыд рæстæджы баззад. Уавæрмæ ныр бæстонæй кæсынц. Дохтыртæ вирусы тыххæй ныр зонынц фылдæр, йемæ тох фæхъомысджындæр. Майы тагъд æххуысы станцæйы фæнд кæнынц инфекцион бригадтæ саразын. Вирус йæ къамтæ нæма æрæвæрдта, æмæ йæм куыд фæндыйы цæстæй кæсæн нæй. Уымæ гæсгæ тагъд æххуысы станцæйы кусджытæ кæдфæнды дæр баххуыс кæнынмæ сты цæттæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv