Дзæуджыхъæуы æвзарынц 2022-æм азы скъолайы хуыздæр хæринаггæнæджы

Æрвылбон сывæллæттæн хæринаг чи кæны, уыдонæн сæ дæсныйад хъуамæ æппæты бæрзонддæр æмвæзадыл уа. Сабиты раз хъæуы æрæвæрын пайдаджын, уыимæ хæрзад аходæн. Цæгат Ирыстоны æвзарынц скъолайы хуыздæр хæринаггæнæджы. «Бæркадджын» ерыстæ куыд цæуынц, уый федтой ме 'мкусджытæ. Хуымæтæг хойрæгтæй скæнынц хæрзад æмæ пайдаджын хæринæгтæ. Фынгтыл — витаминтæй æххст змæстæг, карчы дзидза, адджинæгтæ... Дзæуджыхъæуы базарадон-экономикон техникумы сарæзтой æцæг «бæркадджын» фестиваль. Æнæмæнг домæн — иу хæрианг хъуамæ иннæйы хуызæн ма уа. Иууылдæр сты алыхуызон. Жюрийы уæнгты размæ уал рахастой хъарм хæринаг æмæ карчы фыд. Бæрæггонд цæуы хæринаджы температурæ, уæз, хуыз. Ацы миниуджытæм дæр эксперттæ лæмбынæгæй кæсынц. Архайджыты размæ æвæрд ис стыр домæнтæ. Æмæ уый диссаг нæу. Æрвылбон хæринаг сабитæн кæнынц. Фыццаджыдæр, эксперттæ кæсынц, санитарон домæнтæ куыд æххæст кæнынц, уымæ. Куысты бынат æмæ мигæнæнтæ хъуамæ уой сыгъдæг. Скъолайы хæринаггæнджыты чемпионат ныр дыккаг хатт цæуы. Расидтысты йæ республикæйы ахуырад æмæ наукæйы министрады. Ныридæгæн ахæм æркаст нæ бæстæйы регионтæй иуы дæр нæй. Сæйраг нысан у — скъолайы хæринаггæнджыты дæсныйад фæуæлдæр кæнын. Уæлахиздзаутæ райсдзысты «2022-æм азы скъолайы хуыздæр хæринаггæнæджы» ном. Бæрæггонд æрцæудзысты цалдæр номинацимæ гæсгæ. Хуыздæр хæринаггæнджыты схорзæхджын кæндзæн республикæйы ахуырад æмæ наукæйы министрад. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv