Алагиры районы кусынц адæмæн дон рауадзыныл

Нуазыны дон та ногæй Алагиры районы цæрджыты иувæрсты рауад. Нал та сæм кæлы. Хъуыддаг афтæ риссаг у, æмæ бынатмæ абон сæрмагондæй абалц кодтой республикæйы хицауады уæнгтæ. Адæм доны фарстайы тыххæй арвмæ асинтæ амайынц. Нал сын фаг кæны нæ сæрдыгон, нæ – зымæгон. Кæмæ ракæлы, уыдон та йæм суанг фæстаг тасы онг æвæрæнтæ фæкæнынц, цæмæй йæ амбырд кæной. Кæдмæ ма хъизæмар кæндзысты Алагиры районы цæрджытæ æмæ сæм кæд ракæлдзæн уыцы сызгъæрин дон? Нæ дарддæры æрмæгмæ бакæсынмæ уæ хонæм. Къæлхидты бинонты бон райдайы дон уæларты сæвæрынæй. Æрвылбон æй хъуамæ сфаг кæной æртæ сывæллоныл. Кæй скъоламæ, кæй рæвдауæндонмæ сцæттæ кæнын фæхъæуы. Бæргæ цин кæниккой бинонтæ, тæвд дон сæм кърантæй куы згъорид. Афтæмæй та сæм тæвд нæ, фæлæ уазал дæр тыххæй ракæлы. Хъæуы уæллаг хайы цæрджытæ та дон уæвгæ дæр нал уынынц. Бынæттон цæрджытæ куыд радзырдтой, афтæмæй иу мæйы размæ Суадагмæ доны бардуаг йæ хорз цæстæй ракаст.  Кæдæй-уæдæй сæм ракалд. Ауагътой уæлæмхасæн дондзæуæн хæтæл Брытъиаты уынгæй Кировы номыл уынгмæ, баивтой донцъирæн дæр. Фæлæ куыд рабæрæг, афтæмæй сæ цин бирæ нæ ахаста. Дон та ногæй æрбасатар. Зымæгон æрдзон донгуырæнæн дæр йæ дадзинтæ байсысынц, æмæ уæд адæм кæсаг сурмæ раппарæгау бавæййынц. Æмæ ма канд Суадаг куы уаид. Доны тыххæй сæ хъæрзын райхъуыст Алагиры цæгат-ныгуылæн хайы цæрджытæн дæр. Амæлттæ кæнынц уыдон дæр, æндæр гæнæн сын нæй. Цалынмæ æвæстиат мадзæлттæ сæ тыхы бацæуой, уæдмæ уал бæрнон адæм бавнæлдтой дон æрбаласыны тыххæй адæмы курдиæттæ æххæст кæнынмæ. Бадзурæн ис, районы цы телефоны номыр рауæлдай кодтой, уымæ: 3-13-20. Уынут æй уæ экрантыл. Байхъусдзысты уæм дзы, сæрмагондæй цы штаб сарæзтой, уый уæнгтæ. Курдиæттæ бирæ сты. Æмæ куыннæ ма! Дон нырыккон цардæн йæ базыртæ зилы куыройы фыдтау. Уымæ гæсгæ районы администраци æнæрхъуыдыйæ иу курдиат дæр нæ уадзы. Ацы хай иннæтæй бæрзондддæр ран ис. Сæрдæй-зымæгæй сæм дон нæ хæццæ кæны. Тæвд рæстæг алкæй фаг нал вæййы, зымæджы та донцъирæнты йе `мвæзад æрхауы. Æмæ та адæм – æнæ донæй. Дондзæуæн системæ Алагиры у бындуронæй цалцæггæнинаг. Уыцы хæсмæ се `ргом аздæхтой республикæйы сæргълæууæг æмæ хицауад. Бафтаудзыстæм ма уый, æмæ проекты амынддзинæдтæ сæххæст кæнынæн федералон бюджетæй æхца хъуамæ радтой 2022 азы онг. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv