1-æм апрелы Уæрæсейы райдыдта æфсадмæ сидыны уалдзыгон кампани

Республикæйы райдыдта æфсадмæ сидыны уалдзыгон кампани. Уæрæсейы Федерацийы гæрзифтонг тыхты рæнхъытæ баххæст кæндзысты 900 ирыстойнаг лæппуйы. Æфсæддон комиссариаты кусджытæй исæн къамисмæ хаст чи ’рцæуа, уыдон ацæудзысты вакцинаци. Уыимæ ма спайда кæндзысты 2021-æм азы æфсадмæ исыны амынддзинæдтæй. Дзæрæгъæсты Марат республикон æфсæддон комиссариатмæ йæхæдæг æрбацыд, расидты гæххæт æрбахæссыны размæ. Ахуыры фæстæ йæ бафæндыд æфсадмæ ацæуын. Куыд зæгъы, афтæмæй сæ бинонты нæлгоймæгтæй службæ кодтой се 'ппæт дæр. Йæ сабибонтæй хъуыды кæны, йæ фыд-иу, æфсады цы рæстæг арвыста, уый цы æхсызгонæй æрымысыд, уый. Æфсадмæ сидыны уалдзыгон кампани абон райдыдта нæ бæстæйы регионты се 'ппæты дæр. Æфсадмæ арвитдзысты 134 мин адæймаджы. Нæ республикæйæ гæрзифтонг тыхты рæнхъытæ баххæст кæндзысты 900 лæппуйы. Фароны кампани райдыдта пандемийæимæ иумæ. Уæд æфсæддон комиссариат цыбыр рæстæгмæ йæ куысты фæтк баивта. Архайдтой дистанцион хуызы. Æмæ кæд эпидемиологон уавæр фæхуыздæр, уæддæр санитарон домæнтæ раздæрау æххæст кæнынц. Абрил Абдуллаев, РЦИ-Аланийы æфсæддон комиссары хæстæ рæстæгмæ æххæстгæнæг: «Цы фæлтæрддзинад нæм ис, уымæй, æнæмæнг, ацы кампанийы спайда кæндзыстæм. Нæ мадзæлттæй иу дæр нæ аргъæвдзыстæм. Нæ кусджытæ се 'ппæт дæр ацыдысты вакцинаци. 15 апрелмæ ма ковиды ныхмæ прививкæтæ скæндзысты сæ бинонтæ дæр. Уæдæ фидæны æфсæддонтæн дæр тесттæ кæндзыстæм дыууæ хатты. Фыццаг хатт – сæ районты. Дыккаг хатт та – ам, æмбырдгæнæн пункты, 412-æм госпитæлы медицинон бригадты æххуысæй». Æфсадмæ сидыны уалдзгон кампани сæххæст кæнынæн ис æппæт санитарон-эпидемиологон домæнтæ æххæст кæнынæн хъæугæ æрмæг. Ацы азы фыццаг службæгæнджытæ æфсадмæ æрвыст æрцæудзысты дыууæ къуырийы фæстæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv