Уæрæсейы фæлхасгæнджытæм цæстдарды управленийы кусджытæ рацыдысты радон рейды

Короновирусимæ баст уавæр республикæйы æвзæрдæр кæны. Æмæ кæд Цæгат Ирыстоны рынчынты нымæц, иннæ регионтимæ абаргæйæ, бæрзондыл нымад нæу, уæддæр Фæлхасгæнджытæм цæстдарды управленийы кусджытæ æрвылбон расидынц рейдтæ. Бæрæг кæнынц, санитарон домæнтæ куыд æххæстгонд цæуынц, уый. Фæткмæ гæсгæ, адæм бирæгæйттæй кæм æмбырд кæнынц, уым хъæуы социалон дистанци æххæст кæнын. Фæлхасгæнджытæм цæстдарды управленийы кусджытæ дуканитæ æмæ базартыл кæй æрзилынц, уымæ цæрджытæ сты ахуыр. Æнæниздзинады домæнтæм цæуы лæмбынæг цæстдард Архонская станицæйы дæр. Санитарон-эпидемиологон домæнтæ æххæстгонд куыд цæуынц, уый мидхъуыддæгты министрады минæвæрттæ æмæ бынæттон администрацийы кусджытæ æрвылбон бæрæг кæнынц. Уыцы иу рæстæг рейды рацæуы 5 къорды. Диана Писаренко, дуканийы директор: «Æрбацæуджытæн нæм ис маскæтæ. Уæдæ куы æрбахизынц, уæд сын сæ къухтæ антисептикæй бапырх кæнæм. Пъолыл скодтам нысæнттæ, цæмæй кассæмæ рады чи лæууа, уыдон метр æмæ æрдæгæй хæстæгдæр ма лæууой кæрæдзимæ». Домæнтæм гæсгæ, уæйгæнджытæм хъуамæ уа маскæтæ æмæ æрмкъухтæ. Дезинфекцигæнæн фæрæзтæ дæр дуканиты сты æнæмæнг хъæугæ. Æлхæнджыты ’хсæн та социалон дистанци - метр æмæ æрдæг. Валентина Шаталова, фармацевт: «Æдзухцæрджыты зæрдыл æрлæууын кæнæм, домæнтæ æнæмæнг æххæстгæнгæ кæй сты. Æмбарæм æй, адæм дæр бафæлладысты. Фæлæ нын ныртæккæ нырма æндæр гæнæн нæй». Æнæниздзинады домæнтæ хъæуы æххæст кæнын транспорты, ахуырадон уагдæтты, æхсæнадон бынæтты. Адæм бирæгæйттæй кæм æмбырд кæнынц, уым маскæтæ дарыны фæтк у æнæмæнг. Рейдтæ сног сты 23-æм июнæй, уымæн æмæ коронавирусæй рынчынты нымæц зынгæ фæфылдæр. Хъыбызты Иринæ, РЦИ-Аланийы фæлхасгæнджытæм цæстдарды управленийы территориалон хайады разамонæджы хæдивæг: «Абон цы куыстуæттæ федтам, уыдоны кусджытæ профилактикон домæнтæ æххæст кæнынц. Маскæтæ дарыны фæтк æмæ социалон дистанцийы тыххæй нæм фиппаинæгтæ нæ разынд. Фæнды мæ дуканиты хицæутты зæрдыл æрлæууын кæнын, фæтк куы не 'ххæст кæной, уæд сæ куыстуат санитарон домæнтæм гæсгæ æхгæд æрцæудзæн суанг 90 суткæйы онг». Низимæ тохы хъуыддаджы æрмæст рейдтæ фаг не сты. Хъæуы, фыццаджыдæр, дзыллон вакцинаци. Ныридæгæн Цæгат Ирыстоны коронавирусы ныхмæ прививкæ скодтой 70 000 адæймаджы. Республикæйы ис 52 вакцинацигæнæн пункты. Уыдонæй 40 сты мобилон. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv