Дзæуджыхъæуы цалцæг кæнынц ирон литературæйы музей

Дзæуджыхъæуы нывыл кæнынц Хетæгкаты Къостайы номыл ирон литературæйы музей. Сæйрагдæр хæстæй иу - бæстыхайы историон хуыз бахъахъхъæнын. Йæ цурты цæуæджы цæст рагæй хæцыд, бæстыхай базилинаг кæй у, ууыл. Уæдæ ахæм ран æрцæуæг адæмæй дæр бирæтæ фæтезгъо кæнынц. Ныр хъуамæ сæ цæсты сахада. Аразджытæ пайда кæнынц, зымæджы цы хъарм бонтæ хæссы, уыдонæй дæр. Иу хай иннæйы фæдыл. Аразджытæ арæхстгай калынц советон заманты сæрст къултæ. Ацы хъуыддаджы тагъд кæнын нæ хъæуы. Сæйрагдæр хъæуы бахъахъхъæнын паддзахады рæстæджы агуыридуртæ. Реставраторты хъуыдымæ гæсгæ уыдон суыдзысты музейы фидауц. Аразджытæ тынг арæхстгай кусынц. Сæ къупп-къупп суанг сыхаг уынгты дæр хъуысы. Историон хуыз сног кæнынæн ацы куыстытæ фыццаг къæпхæн сты. Къулты сæрст раивдзысты, саив сæ кæндзысты. Рæстæг цы агуыридуртыл фæтых, уыдон сног кæндзысты. Уыйфæстæ архитектортæ къултæ сахордзысты. Реставраци ма скæндзысты, цы скульптурæтæ æмæ дзы нывæфтыдтæ ис, уыдон дæр. Уый тыххæй æрбахуыдтой фæсарæйнаг специалистты. Уыдон дæр æй æмбарынц, бæстыхай Дзæуджыхъæуы историон хайы кæй ис, æмæ бæрнонæй кæсынц сæ хæстæм. Ныртæккæ музейы реставрацийыл кусынц æвддæс адæймаджы. Цалынмæ иутæ къултæ хафынц, уæдмæ иннæтæ дуæртты æмæ бахизæны асинты историон хуыз ног кæнынц. Музей реставраци кæнынц Аланийыл дзуæрттæ куы бафтыдтой, уый мин сæдæ азы бæрæгбонмæ цæттæгæнæн мадзæлтты фæлгæты. Проектæн сарæзтой паддзахадон историкон-культурон экспертизæ. Куыстытимæ разы сты культурон нысаниуæгимæ объекттæ хъахъхъæнынады республикон комитеты дæр. Сæрмагонд бадзырдмæ гæсгæ, объект срæвдз уыдзæн декабры. Фæлæ аразджытæ куыд зæгъынц, афтæмæй Дзæуджыхъæуы цæрджыты зæрдæтæ аив музейæ балхæндзысты раздæр. Уазиты Зæлинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv