19-ӕм октябры бӕстӕйы бӕрӕг кӕнынц криминалистикӕйы службӕйы равзӕрды бон

Дзыккутӕ, муртæ, рыг — хуымӕтӕг адӕймагӕн сты æрмæст бырон. Фӕлӕ криминалистӕн уыдон ӕвдисӕнтӕ сты. Кӕддӕр Дзабиты Алан фыдракӕнд раргом кодта цалдӕр туджы 'ртахы руаджы. Экспресс-тест равдыста: туг у, кӕй амардтой, уый. Йӕ мард ын ссардтой, кæуыл гуырысхо кодтой, уый цæхӕрадоны. Афтæмæй фыццаг пъӕлицӕмӕ фӕдзырдтой, сылгоймаг фесӕфт, зæгъгæ. Фыдгӕнӕджы ӕрцахстой. Разынд хъастгӕнӕг йӕхӕдӕг. Лыстӕг хъуыддӕгтӕм хъус дарын у криминалисты куысты сӕйрагдӕр. Дзабиты Алан уый бæлвырд зоны. Фыццаг хъуыддаг раргом кодта 17 азы размӕ. Уый уыд лӕгмард. Аланы зæрдыл лæууы: тӕссаг ӕмӕ ӕнахуыр цау уыд. Суанг ма йӕ дӕсныйадӕй ацӕуын дӕр фӕндыд, фӕлӕ слест кӕронмӕ ахӕццӕ кодта. Ныр ахӕм хъуыддӕгтыл сахуыр. Рӕстдзинад эксперттӕй бамбӕхсын къухы нӕ бафтдзӕн. Сайд детектор дæр равдисы. Полиграфæй пайда кæнынц слесты райдианы. Фӕлӕ йыл канд фыдгӕнджыты нӕ фӕлварынц. Ахӕм техникӕ слестгӕнджытӕм алы хатт нӕ уыд. 1954-æм азы советон криминалистикӕ нырма куы равзӕрд, уӕд мӕнгдзинады детектортыл хъуыды дӕр нӕ кодтой. Нырыккон сканерты бӕсты фыдракӕнды бынаты пайда кодтой хуымӕтӕг гипсӕй. Фӕлӕ сӕйрагдӕр нæ аивта. 70 азы фӕстӕ сӕйраг нысан баззад, куыд уыд, афтӕмӕй — фыдракӕндты ныхмӕ тох кӕнын. Сӕ профессионалон бӕрӕгбоныл криминалисттæ сӕмбӕлдысты кусӕн бынӕтты.