Дзæуджыхъæуы Къостайы проспектыл рог хæдтулгæ æрлæууæны дыууæ адæймаджы скъуырдта
Дзæуджыхъæуы рог хæдтулгæйы шофыр фæндагыл нæ сарæхст æмæ æрлæууæнмæ йӕхи бахаста. Хъыгдард баййæфтой дыууæ адæймаджы. Республикæйы Æнæнхъæлæджы уавæрты министрадæй куыд хъусын кæнынц, афтæмæй авари æрцыд райсомы 9 сахаты æмæ 30 минутыл. «Шевроле-Круз» скъуырдта, Къостайы проспекты 237-æм хæдзары цур æрлæууæны транспортмæ цы 49-аздзыд сылгоймаг æмæ 41-аздзыд нæлгоймаг æнхъæлмæ кастысты, уыдоны. Æнæнхъæлæджы уавæрты министрады кусджытæ сын фыццаг æххуыс бакодтой, дарддæр сæ дохтыртæ Республикон клиникон рынчындонмæ фæхæццæ кодтой.