Абон у Джыккайты Шамилы мысæн бон

Аив дзырдæн аргъ чи кæны, уыдонæн абон у ирон литературæйы пехуымпар Джыккайты Шамилы мысæн бон. 10 азы рацыд, не `хсæнæй æвирхъау хуызы куы фæхъуыд, уыцы бонæй. Фæлæ абон дæр ирон литературæйы къæбицы дуар цыма гомæй аззад, афтæ кæсы адæймагмæ. Шамил йæ фыццаг рæнхъытæ ныффыста, 9-æм къласы ма куы ахуыр кодта, уæд. Рухс та йын фыццаг хатт федтой 1962-æм азы. Иров аив дзырды дæсныйадмæ æрыгон, фæлæ ныфсджын поэт кæй æрбакъахдзæф кодта, уый уайтагъд фæбæрæг. Йæ дарддæры фæндагыл Джыккайы-фырт гуырысхо нал кодта. Райста уæлдæр ахуырад, сси профессор. Уыд бирæ монографитæ, критикон æмæ зонадон уацты автор. Йæ профессионалон зонындзинæдтæ æрæнцадысты фольклор, стæй ирон литературæйы истори иртасæн чингуыты сыфтыл. Егъау куыст бакодта тæлмац кæныны дæр. Джыккайты Шамилы руаджы иронау сдзырдтой Шекспир, Софокл, Эдмон Ростан, Бёрнс, Шиллер, Лермонтов æмæ æндæртæ. Уæдæ йæ къухæй цал студенты рацыд, уыдоны та нымад дæр ничи фæуыдзæн. Цæгат Ирыстоны паддзахадон университеты ирон филологийы факультеты ма абон дæр Джыккайты Шамилы ном ахсы йæхи æнæфæцудгæ бынат. Хорз хъуыды кæнынц йе `мкусджытæ æмæ студенттæ дæр, куыд æнæрцæф æмæ уæндон уыдис, уый. Бирæ хатт æм æртхъирæн кодтой йе сфæлдыстады тыххæй. Хъыгагæн, 2011-æм азы 26 майы уыцы æртхъирæнтæ æххæст дæр бакодтой, мыггагмæ ирон адæмы цæсты йæхи чи бафтыдта, уыдон. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv