Цæгат Ирыстоны дарддæр æххæст кæнынц æппæтуæрæсеон проект «Урок цифры», зæгъгæ

«Урок цифры», зæгъгæ, æппæтуæрæсеон проект дарддæр æххæст кæнынц Цæгат Ирыстоны. Абон нæ республикæйы информацион технологитæ æмæ бастдзинады управленийы разамонæг Сæлбиты Алан уый тыххæй ацыд Октябрскæмæ. Хистæркъласонтæн амыдта, æнæшофыр транспортæй куыд пайдагæнæн ис, уый. Йæ сæрмагонд урочы темæ уыимæ баст уыд. Ног технологитæй рæстæджы домæнтæм гæсгæ пайда кæнын. Ахæм хъуыдыйыл хæст у нæ республикæйы информацион технологитæ æмæ бастдзинады управленийы разамонæг Сæлбиты Алан. Зæгъæм, æнæ шофырæй чи кусы, ахæм хæдтулгæтæ уæрæхæй-уæрæхдæр кæнынц дунейы алы кæрæтты. Цы хъыгдары, æмæ сæ Ирыстоны дæр спайда кæной? Æнæмæнг кæй фæзындзысты, ууыл комитеты зæрдæ дарынц. Скъоладзаутимæ фембæлд ацыд диалоджы хуызы. Æрныхас кодтой социалон хызæгты хъомысыл. Фæсивæдмæ бафæрсынæй фæстæ нæ фæлæууыдысты. Фылдæр сæ цымыдис кодта спорт. Зæгъæм, киберспорты райрæзт Сюхин Максим æм йе `ргом аздæхта. Фæнды йæ стыр æнтыстытæ равдисын ацы къабазы. Сæлбиты Алан ма скъоладзаутæн радзырдта интернеты тыгъдады æдасдзинад æмæ хи информаци хъахъхъæныны мадзæлтты тыххæй. Йæ ныхасы сæр уыдис нырыккон технологитæй пайда кæныны æдасдзинад дæр. Комитеты разамонæг фæнысан кодта, нымæцон технологитæм кæстæр фæлтæр хъуамæ æнæмæнг æмхиц уа. Ног технологитæ нырыккон цард æнцондæр æмæ цымыдисагдæр кæй кæнынц, уый дызæрдыккаг нæу. Ног дæсныйæдтæ æхсæнады, æнæмæнг, фæзындзæн. «Нымæцон урок»-тæ уымæн хорз ахъаз сты. Кæстæр фæлтæрæн абоны царды сыфтæ фæлдахынæн æххуыс сты. Æмæ сæ уымæ хъæуы разæнгард кæнын. Пелиты Сабинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv