Кинематографист Гулуты Вячеслав бæрæг кæны йæ 80 азы юбилей

Кинематографийы дæсны Гулуты Вячеслав абон бæрæг кæны йæ 80 азы юбилей. Уæрæсейы æмæ Цæгат Ирыстоны аивæдты сгуыхт архайæг арфæтæ исы бæстæйы алы рæттæй. Уæрæсейы кинематографимæ цы 'вæрæн бахаста, уымæн аргъ нæй. Юбилярæн раафæ кодта не сфæлдыстдон къорд дæр. Гулуты Вячеслав æнæ мидбылхудтæй йæ камерæйы кой кæнын зонгæ дæр нæ бакæндзæн. Объективæй цард æндæрхуызон у, зæгъы зындгон кинооператор, режиссер æмæ продюсер. Камерæ раргом кæны адæмы миддуне, царды цымыдисаг хабæрттæ. Алы кадры дæр бавæрæн ис арф хъуыды. Вячеслав каст фæцис кинематографийы хуыздæр скъола - ВГИК. Æмæ кæд аивадон кинойы курс фæцис, уæддæр йæ зæрдæйæн хæстæгдæр у документалистикæ, хорз æм кæсы адæймаджы цард æмæ удыхъæд куд у, афтæмæй равдисын. Йæхи тыххæй дзурын Гулуты Вячеслав нæ уарзы, фылдæр кæны фæсивæды кой. Йæ зæрдæ дары, республикæйы кæй сног уыдзæн кинотæ исыны хъуыддаг ныры разамынды руаджы. Уæдæ нæм ис куыд фæлтæрджын хистæртæ, афтæ курдиатджын фæсивæд дæр, зæгъы юбиляр. Уæрæсейы æмæ Цæгат Ирыстоны аивæдты сгуыхт архайæг, Советон Цæдисы кинематоргафийы хуыздæр кусæг, Уæрæсейы кинематографистты Цæгат-Кавказаг хайады сæргълæууæг йе 'сфæлдыстадон архайд райдыдта Цæгат Кавказы кинохроникæйы студийы. Фыццаг иста сюжеттæ. Фæстæдæр та бавнæлдта кинонывтæм. Йæ фыццаг документалон кинонывтæй иу - «Плачьте, мальчики, и не сдавайтесь», зæгъгæ. Ирдæй дзы æвдыст цæуы спортсменты миддуне - æцæг, æнæ аразгæ æнкъарæнтæй. Æмæ афтæ у йæ алы куыст дæр. 2018-æм азы та Гулуты Вячеслав сси Хетæгкаты Къостайы номыл паддзахадон премийы лауреат документалон кинонывы тыххæй «Счастливая звезда генерала», зæгъгæ. Телефонæй арфæйы ныхæстæ Туаты Теминæйæ. Уæдæ фыстæджытæ та бæстæйы алы рæттæй. Гулуты Вячеслав йæ юбилейыл сæмбæлд уæнгрогæй. Фидæнмæ йæм ис бирæ фæндтæ æмæ нысантæ. Цы кинонывтæ сфæнд кожта, уыдоныл æнæмæнгæй бакусдзæн фæсивæдимæ иумæ. Гугкаты Иринæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv