РЦИ-Аланийы сæргълæууæджы хæстæ рæстæгмæ æххæстгæнæг Сергей Меняйло фембæлд журналисттимæ

Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло фембæлд регионалон æмæ федералон журналисттимæ. Регионы разамонæджы размæ рахастой республикæйы цæрджыты риссагдæг æмæ ахсджиаг фарстатæ. Се 'хсæн медицинæ, æхсæнадон транспорты куыст, ахуырады системæ. Цæгат Ирыстоны нырыккон æмæ ифтонггонд медицинон лабораторитæ нæй. Уымæ гæсгæ, республикæйы цæрджыты бахъæуы сыхаг регионтæм ацæуын æмбæлгæ иртæстытæ скæнынæн. Сергей Меняйло куыд фæнысан кодта, афтæмæй фарста райхалынæн хъæуы æнæниздзинад хъахъхъæныны системæ сног кæнын. Хъуыддагыл бакусын хъæуы фидæны азмæ бюджет снысан кæныны агъоммæ. Цæмæй фæрæзтæ дихгонд æрцæуой. Ныхас ма цыд æсхæнадон транспорты куыстыл. Системæ куыд æмбæлы, афтæ нæ кусы Дзæуджыхъæуы, стæй æнæхъæн республикæйы дæр. Зынтæй ацæуæн ис горæтæй иуæй иу хъæутæм. Уыимæ ма, республикæйæ сыхаг гæрæттæм дæр транспорт цæуы къуылымпытимæ. Уымæ гæсгæ адæмы бахъæуы таксийы лæггæдтæй пайда кæнын. Журналисттæ бафарстой, хъуыддаг хуыздæрырдæм раивæн куыд ис, уымæй. Сергей Меняйло куыд фæнысан кодта, афтæмæй регионы транспорты пъланæвæрды гæххæтытæ нæй. Уый та фадат нæ дæтты куыст æнæ къуылымпытæй сæвæрынмæ. Сергей Меняйло фæбæрæг кодта, гæххæттыл бакусынæн фæрæзтæ ис. Ныртæккæ агурынц куыстуæттæ. Цæмæй бирæвæрсыгæй фарста лыггонд æрцæуа. Уый руаджы республикæйæн фадат уыдзæн федералон программæты архайынæн. Хæдтулгæты парк сног кæнын, стæй системæйы куыст адæмы курдиæттæм гæсгæ саразын. Ахсджиаг фарстаты 'хсæн уыд ахуырады системæйы кусджыты мызд. Регионы разамонæджы хъуыдымæ гæсгæ, ахуыргæнджыты мызд ныртæккæ раст системæмæ гæсгæ нымад нæ цæуы. Хъæуы йæ баивын. Фæлтæрдзинад бирæ кæмæ ис, уыцы педагогтæн хъуамæ æнæмæнг сæ мызд уа фылдæр. Фæлæ, ног системæмæ рахизын ног азæй раздæр нæ бантыстдзæн. Быроны полигоны арæзтад регионы æрæджы бауырæдтой. Куыд рабæрæг, афтæмæй куыстытæ æххæст кæнынæн æмбæлгæ гæххæтытæ нæ уыд. Бæлвырддæр дзургæйæ та, фæзуаты пъланы проект. Ныртæккæ инвестор программæмæ хæссы ивддзинæдтæ. Проект ацыд экологон экспертизæ. Ныхас ма цыд зæххыты фарстайыл. Раздæры колхозтæ æмæ совхозты фæзуæттæ æнæзакъонæй бахаудысты хицæн адæмы къухтæм. Цæрджытæ та баззадысты æмæ зæххытæй. Регионы разамонæг фæбæрæг кодта, хæстæгдæр рæстæг æппæт зæххытæ инвентаризацигонд кæй æрцæудзысты. Сбæрæг кæндзысты, кæй бæрны сты. Фембæлды кæронбæттæны Сергей Меняйло загъта, ахæм æбмырдтæ арæх кæй уыдзысты. Ахæм хуызы бæрæг кæндзысты риссагдæр фарстатæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv