Горæтгæрон районы райдайдзысты COVID-19-ы ныхмæ прививкæтæ кæнын

Коронавирусæй вакцинаци дарддæр цæуы Цæгат Ирыстоны. Йæ сæйраг нысан – адæймагæн йæ иммунитет фæхъæддыхдæр кæнын. Нæ республикæйы ныридæгæн ис 500 дозæйы бæрц вакцинæ. Пайда дзы кæнынц куыд Дзæуджыхъæуы, афтæ районты дæр. Бæлвырддæр нæ дарддæры æрмæджы. Коронавирусы ныхмæ прививкæ кæныны пункт фæзындзæн Горæтгæрон районы сæйраг рынчындоны. Ныртæккæ ам цæуынц цæттæгæнæн мадзæлттæ. Дзæбæхгæнæндон ифтонг кæнынц хъæугæ кусæнгæрзтæй. Сæйрагдæр та уазалгæнæнтæй. Вакцинæ дарын хъæуы, 18 градусы онг уазал кæм у, ахæм ран. Прививкæ скæныны размæ – лæмбынæг медицинон æркаст. Уый фæстæ пациенты базонгæ кæнынц сæрмагонд сыфимæ. Нысангонд дзы æрцæуы «Гам-КОВИД-Вак» кæнæ «Спутник V»-ы тыххæй бæлвырд хъусынгæнинаг. Прививкæ кæмæн скæнынц, уымæ ма дохтыр сахаты `рдæджы бæрц йæ цæст фæдары. Вакцинæ фыццаг араздзысты медицинон, социалон æмæ ахуырады къабазы кусджытæн. Цæрджытæй 18 азæй къаддæр æмæ 60 азæй фылдæр кæуыл цæуы, уыдонæн вакцинæ нырма нæ кæндзысты. Уыимæ ма æппынæдзух низджын чи у, уыдоныл дæр æй нæ фæлварынц. Горæтгæрон районы ныртæккæ вакцинацийы райдианмæ чи æнхъæлмæ кæсы, уыдон бирæ сты. Се 'хсæн – йæ бинонтæн, йæ хистæртæн фæрынчынæй чи тæрсы, уыдон. Фæлæ ис, дызæрдыг чи кæны, ахæмтæ дæр. Дохтыртæ куыд зæгъынц, афтæмæй коронавирусы низ ма `руадзыны тыххæй фыццаджыдæр прививкæтæ хъуамæ скæной, бирæ адæмы ‘хсæн чи вæййы æрвылбон, уыдон. Йæ нысан раздæрау ахсджиаг æмæ ахадгæ – адæймагæн йæ иммунитет фæфидардæр кæнын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv