Дзæуджыхъæуы сарæзтой «Уæлахизы бал»

Нæ республикæйы 9-æм майимæ баст мадзæлттæ дæрддæр цæуынц. Василий Жуковскийы номыл парчы сарæзтой «Уæлахизы бал». Сывæллæты сфæлдыстадон коллективтæ зарыдысты æфсæддон зарджытæ. Гом арвы бын сын аргъ кодтой сæ кадджын уазджытæ - Фыдыбæстæйы Стыр хæсты ветерантæ æмæ Ленинграды æрхъула хи цæстæй чи федта, уыдон. Куыд нæ сын уыдаид æхсызгон, кæстæр фæлтæр сын сæ уæззау уаргъ кæй æмбары æмæ сын кад кæй кæны. Зындгонд «Катюша», «Землянка», «Смуглянка». Ацы зарджытæ чи нæ зоны, ахæм, æвæццæгæн, нæй. Систы Уæлахизы æвдисæнтæ. Дзæуджыхъæуы Жуковскийы парк цыма ивгъуыдмæ абалц кодта, афтæ рауад. Æрыгон кафджытæ сæхи цалдæр къуырийы цæттæ кодтой ацы «Уæлахизы балмæ». Уæлдай бæстонæй æвзæрстой 40-æм азты костюмтæ дæр. Сæ сæйраг хæс уыд хæсты рæстæг адæммæ цы æнкъарæнтæ уыд, уыдон равдисын. Мадзалы архайджытæ зæрдиагæй дзырдтой хæстон цаутæ. Сывæллæттæ сæ хистæрты хъбатырдзинады историимæ зонгæ кодтой уазджыты. Фæлæ уæлдай цæстæнгас, кæй зæгъын æй хъæуы, здæхт уыд ветерантæ æмæ Ленинграды æрхъулайы чи уыд, уыдонмæ. Бæрæгбон дæр сын сæрмагондæй сарæзтой. Хæсты зынтæ уыдон сæхиуыл банкъардтой. Сæ ныхæстæм гæсгæ, истори зыгъуыммæ фыссæн æмæ ивæн нæй. Нæ республикæйы «Уæлахизы бал» ныр цæуы дыккæгæм хатт. Йæ аразджыты ныхæстæм гæсгæ, ахæм хуызы рæзгæ фæлтæр зонгæ кæны уыцы рæстæджы цаутæ æмæ уавæримæ, бамбарынц, æцæг патриотизм цы у, уый. Сабитæ зæрдæргъæвдæй архайдтой балы, бирæ цыдæртæ ма сæ бафæндыд скæнын, разынд сæм ног хъæппæристæ. Уымæ гæсгæ мадзал суыдзæн æрвылазон. 9-æм май у иумæйаг бæрæгбон. Æнгом кæны алы фæлтæртæ. «Уæлахизы бал» дæр уымæн уыд æвдисæн. Бæлвырд дзы разынд хистæрты æмæ кæстæрты бастдзинад. Вальсы мелодимæ æмзонд æмæ æмзæрдæйæ дæр уымæн иумæ кафыдысы. Биджелты Бертæ