Цæгат Ирыстоны райдыдтой ерыстæ уæззау атлетикæйæ

Цæгат Ирыстоны ерыстæ уæззау атлетикæйæ райдыдтой абон Хæххон-аграрон университеты галуаны. Йæ архайджытæ сты куыд лæппутæ, афтæ чызджытæ дæр. Сæ тыхтæ фæлварынц куыд æрыгон, афтæ фæлтæрдджын спортсментæ дæр. Хъару æмæ арæхстдзинад. Спортсментæ сæ тыхтæ фæлварынц штангæ исынæй. Спорты ацы хуызы канд тых нæ хъæуы, фæлæ ма уды хъæддыхдзинад дæр. Æрыгон спортсментæ фæзмæ рацæуыны размæ сæ къухтæ мелæй байсæрдынц. Хъуамæ штангæ къухæй ма быра. Стæй уæд штангæ фæуæле кæнынц: иу хатт схуыстæй, дыккаг хатт та – рæхуыстæй. Хуыздæрыл нымад у, фылдæр уæз чи сиса, уый. Таймураз Черкасов у ерысты æппæты кæстæр архайæг. 9 азæй йеддæмæ йыл нæ цæуы. Уæззау атлетикæйыл æй йæ фыд фæцалх кодта. Ныр, афæдзы дæргъы ацы спортыл тынг æнувыд у. Чемпионаты бирæтæ фыццаг хатт нæ архайынц. Тогойты Хетæгæн иу хатт бантыст 3 бынат бацахсын. Абон дæр сфæнд кодта йæхи бафæлварын. Штангæ систа 3 хатты. Иу хаттæй иннæмæ штангæйы уæз кодта фылдæр. Уæззау атлетикæйæ ерысты сæ арæхстдзинад æвдисынц 100 спортсменæй фылдæр. Сæ кармæ гæсгæ сæ адих кодтой 4 къордыл, уæзмæ гæсгæ та – 10 къордыл. Сæхи æвзарынц куыд лæппутæ, афтæ чызджытæ дæр. Уагæвæрдмæ гæсгæ чемпионаты архайынц, 13 азæй фылдæр кæуыл цæуы, уыцы спорстментæ. Фæлæ, кæстæртæн дæр бар радтой сæхи равдисынæн. Уый руаджы сын дарддæр æнцондæр уыдзæн егъау ерысты архайын. Ныр цы `нтыстытæ хъуамæ бафта сæ къухы, уый та фæлтæрдджын тæрхонгæнджыты бар у. 26-æм декабры ма ерысты сæ арæхстдзинад равдисдзысты 15 азæй хистæр спортсментæ. Уæд сбæрæг уыдзысты уæлахиздзауты нæмттæ дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv