Цæгат Ирыстоны дарддæр æххæст кæнынц мæгуырдзинады ныхмæ программæ

Куысты ныллæууын, зæхх кæнæ фосы куыст райдайын, амалхъомады хи бафæлварын. Ахæм хуызы æххуыс Цæгат Ирыстоны цæрджытæн бакæнæн ис мæгуырдзинадимæ тохы программæйы руаджы. Бацархайыны фæнд дзы чи скæны, уыимæ бафыссынц социалон контракт. Дыгуры районы программæйы фæлгæты куыст ссардтой 24 адæймаджы. Сæ мыздæй уæлдай ма 4 мæйы дæргъы исдзысты паддзахадон фиддонтæ цæрыны æппынкъаддæры бæрц. Гæззаты Аланæ куыст рагæй агуырдта. Арæх-иу касти ваканситæм газетты æмæ интернеты. Фæлæ йæ къухы ницы æфтыд. Дыууæ мæйы размæ æххуысагур бацыд куыстдæттыны центрмæ. Æнхъæл дæр нæ уыд, йæ бæллиц ахæм тагъд сæххæст уыдзæн, уый. Сылгоймагимæ бафыстой социалон контракт мæгуырдзинадимæ тохы программæйы фæлгæты. Хъæугæ гæххæттытæ куы æрымбырд кодта, уæд ын снысан кодтой куысты бынат. Ныр кусы Дигорайы поликлиникæйы. Аланæ каст фæци Мæскуыйы 37-æм медицинон училищæ. Фыццаг уал ын бынат снысан кодтой регистратурæйы. Йæ куыстыл æнувыд куы разынд, уæд ын разамынд бабар кодта медицинон хойы куыст дæр. Ныр фæссихор та травмотологæн æххуыс кæны рынчынты дзæбæх кæнынмæ. Гæззаты Аланæ йæхæдæг куыд зæгъы, афтæмæй йæ куыст йæ зæрдæмæ тынг цæуы. Ам æххæстæй бамбæрста, адæмæн æххуыс кæнын йæ царды нысан кæй у. Куыст ссарыны социалон контракт у комкоммæ æххуысы хуызтæй иу. Программæйы архайджытæ сæ мыздæй уæлдай исынц паддзахадон æххуыс - æрвылмæйон фиддон 10 599 сомы цыппар мæйы дæргъы. Уый у цæрынæн æппынкъаддæры бæрц. Курдиат бадæттыны фæстæ программæйы архайæджы хъуамæ банымайой æххуысцухыл. Æрмæст уæд бафыссынц контракт. У 9 мæйы æмгъуыдмæ. Æрæфы районы куыстдæттыны центры «Мæгуырдзинадимæ тох»-ы программæйы фæлгæты ацы аз куыст ссардтой 24 адæймагæн. Æдæппæтæй ацы аз Цæгат Ирыстоны куыстдæттыны комитет социалон контракттæм гæсгæ куыст ссардта 310 адæймагæн. Уымæй уæлдай ма «Мæгуырдзинадимæ тох»-ы программæйы фæлгæты ис зæхх кæнæ фосы куыст райдайæн кæнæ та амалхъомады хи бафæлварæн. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv