Æрæфы районы бындуронæй цалцæг кæнынц социалон объекттæ

Æрæфы районы социалон объекттæ цалцæг кæнынц 2019 азæй. Скъолатæ, рæвдауæндæттæ, культурæйы хæдзæрттæ бындуронæй рацарæзтой. Ацы аз пъланы ис базилын 7 фельдшерон-акушерон пунктмæ федералон программæ «Развитие здравоохранения»-йы фæлгæты. Уыимæ ма хъуамæ бындуронæй сцалцæг кæной Цыколайы дыккæгæм скъола, æхсæнадон фæзтæ, фæндæгтæ æмæ тротуартæ Хъæууон Культурæйы хæдзар Ног Урухы бирæ рæстæг цалцæггонд цыд кусджытæн сæхи хъаруйæ. Ныр æй сæрмагонд программæйы фæлгæты бындуронæй рацарæзтой. 6 мæйы æмгъуыдмæ культурæйы ног хæдзар цæхæртæ скалдта. Тагъд рæстæджы сывæллæттæ æрбакъахдзæф кæндзысты ног райдзаст бæстыхаймæ. Бырнацты Анатолий , Ног Урухы культурæйы хæдзары директор: «Алыхуызон куыст кæндзыстæм нæ сывæллæттимæ. Адæмон театр дæр нæм ис, сывæллæтты кафтыты театр, вокалон къорд. Бирæ сты. Сабитæ алы къорды дæр разæнгардæй архайынц. Ахæм райдзаст бæстыхайы та сын уæлдай æхсызгондæр уыдзæн кусын». Быдыры Дæргъæвсы та нырма куыстытæ сæ тæмæны сты. Ам дæр тагъд рæстæджы сырæздзæн культурæйы ног хæдзар. Кусы дзы 10 адæймаджы. Ныридæгæн бæстыхайæн йæ сæр ивд æрцыд. Бæстыхайы къултæ сæрдынц. Специалисттæ куыд бафиппайдтой, афтæмæй фæззæджы куыстытæ кæронмæ фæуыдзысты. Куыдзойты Аслæнбег, Æрæфы районы администрацийы культурæйы хайады разамонæджы хæдивæг: «Куыстытæ кæронмæ куы æрхæццæ вæййынц, уæд æппæт бæстыхæйтты дæр æрæвæрæм офисон мебель. Уыдон иууылдæр бынæттон хиуынаффæйады æххуысæй. Музыкалон инструменттæ дæр æлхæд æрцæуынц. Алкæцы сывæллонæн дæр æхсызгон куыд нæ уыдзæн ног райдзаст бынатмæ æрбахизын, æдæмон инструменнтыл цæгъдыныл, кафыныл сахуыр уæвын. Уыимæ сæм æвзæрын кæнæм уарзондзинад нæ историмæ не `гъдæуттæм». Æрæфы районы социалон объектты арæзтадмæ здахынц уæлдай æргом. Скъолатæ, рæвдауæндæттæ, фæндæгтæ, тротуартæ, æхсæнадон фæзтæ цалцæггонд æрцыдысты. Дарддæр дæр архайдзысты. Айларты Эмилия _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv