Цæгат Ирыстоны дарддæр цæуы диспансеризаци
Афæдз иу хатт æнæмæнг диспансеризаци ацæуын хъæуы Уæрæсейы цæрджыты. Уый у национ проект «Æнæниздзинад хъахъхъæнынад»-ы сæйраг нысантæй иу. Цы уавæры ис ацы фарста Цæгат Ирыстоны æмæ медицинон куыстуæттæ куыд цæттæ сты, диспансеризаци æмбæлгæ æмвæзадыл сæххæст кæнынмæ, уый тыххæй нæ дарддæры æрмæджы. Цæгат Ирыстоны дарддæр цæуы цæрджыты диспансеризаци. Мадзал æххуыс у низ рагагъоммæ раиртасынмæ æмæ йæ афойнадыл дзæбæх кæнын райдайынмӕ. Æрæджы дохтырты къорд бабӕрæг кодта Кировы районы Ираны хъæуы фелсырон-акушерон пункт. Ам дохтыртæм æхсызгонæй æнхъæлмæ кастысты. Йе 'нæниздзинад кæмæн фæцудыдта, уыдон ныртæккæ гыццыл не сты. Бирæтæм уыд коронавирус. Уый та ууыл дзурæг у, æмæ æппынæдзух низджын чи у, уыдоны низтыл ма бафтыд. Бынæттон терапевт куыд радзырдта, афтæмæй пандемийæ бирæ цæрджыты бахъыгдæрдта. Ныртæккæ низ йæхиуыл чи банкъары, уыдон уайтагъд бацагурынц дохтыры æххуыс. Фæлæ рӕстӕгӕй-рӕстӕгмӕ æркаст у пайдадæр. Диспансеризацийы фыццаг къæпхæн — пациентты анкетæтæ. Дарддæр дохтыры æркаст. Кæд пациентæм низ сбæрæг кӕнынц, уæд æй дарддæр арвитынц специалисттæм. Дохтырты æркаст у лæвар. Хъæуы цæрджыты медицинон æххуысы фӕдыл районы рынчындонмæ цæуын кæй фæхъæуы, уымæ гæсгæ диспансеризаци у æнæмæнг хъуыддаг. Диспансеризацийы процедурæ уæлдай ахсджиаг у карджын адæмæн. Уыдоныл низтæ арæхдæр фæтых вæййынц. Дохтыртæ иу бынаты кæй сты, уый, цæрджыты ныхæстæм гæсгæ, у удæнцой. Фыййагдоны скъолайы ахуырдзаутæн сæ бон райдыдта медицинон æркастæй. Алагиры районы рынчындоны дохтыртæ расидтысты диспансеризаци. Стоматолог, офтальмолог, педиатр, хирург, невролог — специалисттæ бæстон кæсынц сывæллæттæм. Дæттынц сын хъæугæ амынддзинæдтæ. Медицинон æркаст профилактикон хуызы арæзт цæуы низ рагагъоммæ сбæрæг кæнынæн. Медицинон кусджытæ алы сывæллоны гæххæттытæм дӕр бæстонæй кæсынц. Скъоладзауты диспансеризаци хорз æххуыс у дохтырты æргом раздахын сывæллæтты æнæниздзинадмæ. Рады лæууын нӕ бахъӕуы сывӕллӕтты, афтӕмӕй сӕм хи скъолайы, ӕнӕ бафӕллайгӕйӕ, дохтыртӕ лӕмбынӕг æркасынц. Цæгат Ирыстоны авд мæймæ диспансеризацийæн баххæст кодтой йæ 33%. Ныртæккæ æппæт районтæн дæр республикæйы сæргълæууæджы хæстæ рæстæгмæ æххæстгæнæг Сергей Меняйлойы амындмæ гæсгæ специалисттæ бацæттæ кæндзысты графиктæ. Фæнысан дзы кодтой хъæутæ, се 'хсæн дæрддзæф ран чи ис, ахӕмтӕ дæр. Бынатмæ араст уыдзысты медиктæ. Сæ хæстæ — вакцинаци, тестытæ æмæ диспансеризаци. Республикæйы æнæниздзинад хъахъхъæнынады министры хæстæ рæстæгмæ æххæстгæнæг Тебиаты Сосланы ныхæстæм гæсгæ, диспансеризаци бæстонæй баххæст кæндзысты. Хæстæгдæр рæстæг ма медицинон кусæнгæрзты хыгъд дæр фæфылдæр кæндзысты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv