Уæрæсейы фæлхасгæнджытæм цæстдарды управлени æмæ мидхъуыддæгты министрады кусджытæ рацыдысты радон р

Фæлхасгæнджытæм цæстдарды управлени æмæ мидхъуыддæгты министрады кусджытæ иумæ дарддæр архайынц рейдты. Бæрæг кæнынц Цæгат Ирыстоны эпидемиологон уавæр, стæй цæрджытæ санитарон домæнтæ куыд æххæст кæнынц, уый. Радон хатт федтой афтектæ æмæ дуканитæ. Аиппытæ кæм разынд, уыцы бынæтты кусджытимæ ныхас кодтой, сæрмагонд амынддзинæдтæ сын радтой. Рейды уыд нæ уацхæссæг Дзæдзойты Фатимæ дæр. Дуканитæ æмæ афтектæм бахизгæйæ, дуарыл фенæн ис фыст «Æлхæнджытæн æнæ маскæтæй нæ лæггад кæнæм», зæгъгæ. Санитарон домæнтæ хъуамæ æххæст кæной иууылдæр. Куыд уæйгæнджытæ, афтæ æлхæнджытæ дæр. Уыимæ ма маскæ кæуыл нæй, ахæм æлхæнæгæн лæггад кæнын дæр нымад у фæткхæлдыл. Маскæтæ æмæ дезинфекцигæнæн фæрæзтæй уæлдай ма, æхсæнадон бынæттæ хъуамæ æнæмæнг ифтонг уой уæлдæф сыгъдæггæнæн гарзæй - рециркулятор кæй хонынц, уымæй. Куысты размæ дуканигæсты хъæуы сæ буары тæвд сбарын. Фæбæрæг æй кæнынц сæрмагонд журналы. Æмæ афтæ æрвылбон. Уæдæ нæ хъæуы рох кæнын социалон дистанцийы тыххæй дæр. Æхсæнадон бынæтты санитарон-эпидемиологон домæнтæм уæлдай цæстдард хуымæтæджы нæй. Ам адæм бирæгæйттæй æмбырд кæнынц æмæ уый тыххæй хæцгæ низ æнцонæй парахат кæны. Рейды архайджытæ дуканиты хицауады, фыццаджыдæр, бафарстой, низ ма парахат кæнынӕн цавæр мадзæлттæ арæзт цæуынц, уымӕй. Ныртæккæ медицинон маскæтæ дарын цас пайда у, уый æлхæнджытæ дæр хорз æмбарынц. Цæрджыты фылдæр хай хихъахъхъæнæн фæрæзтæй пайда кӕнынц æрлæууæнтæ, æхсæнадон транспорт, базартæ, дуканитæ, афтектæ æмæ иннæ æхсæнадон бынæтты. Фæлæ уæддæр Уæрæсейы фæлхасгæнджытæм цæстдарды управленийы амынддзинæдтæ иуылдæр не`ххæст кæнынц. Уæрæсейы фæлхасгæнджытæм цæстдарды управлени æмæ Мидхъуыддæгты министрады кусджытæ æрвылбон бæрæг кæнынц, æнæниздзинады домæнтæ æхсæнадон бынæтты куыд æххæст кæнынц, уый. Радон хатт бахатыдысты цæрджытæм, цæмæй сæхи æмæ иннæты æнæниздзинад бахъахъхъæной. Зæрдыл æрлæууын кодтой, фæткхалджытæ административон æгъдауæй дзуапп кæй дæттдзысты, уый дæр. Специалистты ныхæстæм гæсгæ, ахæм рейдтæ араздзысты дарддæр. Сæйрагдæр у, цæмæй цæрджытæ сæрдыгон рæстæг дæр æххæст кæной æппæт амынддзинæдтæ. Уыдон хъæуынц, цæмæй ног коронавирусы инфекци дарддæр ма парахат кæна. Управленийы кусджытæ ма иу хатт зæрдыл лæууын кæнынц, инфекцийы ныхмæ æппæты хуыздæр хъомыс у домæнтæ кæронмæ æххæст кæнын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv