Дзæуджыхъæуы наукон центры директорæй снысан кодтой Цыбырты Алексейы

Дзæуджыхъæуы наукон центры директорæй снысан кодтой Цыбырты Алексейы. Уыцы хæстæ рæстæгмæ æххæст кодта 2018-æм азæй нырмæ. Снысан æй кодтой æвзæрстыты хатдзæгтæм гæсгæ. Ахуыргæндты совет, йе сконды 20 адæймаджы, афтæмæй рæгъмæ рахаста 3 кандидатурæйы. Уыдон, фæткмæ гæсгæ, фидаргонд æрцыдысты 3 бынаты – Уæрæсейы Наукæты Академийы, Уæрæсейы ахуырад æмæ наукæйы министрады, стæй Уæрæсейы президенты цур сконд къамисы. Цыбырты Алексей куыд фæнысан кодта, афтæмæй æвзæрстытæ хъуамæ раздæр ацыдаиккой, фæлæ сæ коронавирусы аххосæй аргъæвтой. Санитарон домæнтæ хынцгæйæ сæ сарæзтой 4-æм августы. Хъæлæс кæныны бар уыди, Дзæуджыхъæуы наукон центры бæрны цы 5 институты ис, уыдоны кусджытæн. Сæ фылдæр схъæлæс кодтой Цыбырты Алексейыл. Йæхæдæг куыд зæгъы, афтæмæй йыл наукон кусджытæ кæй баууæндыдысты, уый бирæйы аргъ у. Æвзæрстытæ сты фыццаг къæпхæн, дыккаг та - Уæрæсейы ахуырад æмæ наукæйы министрады фидаргонд уынаффæ. Дзæуджыхъæуы наукон центр иу кæны 5 наукон-иртасæн институты. Уыдонмæ хауынц – Цæгат Ирыстоны гуманитарон æмæ социалон иртæсæнты, Геофизикон, Цæгат Кавказы хæххон хæдзарады æмæ Биомедицинон иртæсæнты, стæй Хуссар математикон институттæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv