Республикæйы сæргълæууæг Битарты Вячеслав фембæлд Михаил Мурашкоимæ

Кусгæ балцы рæстæг республикæйы сæргълæууæг Битарты Вячеслав фембæлд Уæрæсейы Федерацийы æнæниздзинад хъахъхъæныны министр Михаил Мурашкоимæ. Цæгат Ирыстоны разамонæг ын бузныг загъта, коронавирус пандемийæйы бонты нæ йе `ххуысæй кæй æрхъуыды кодта, уый тыххæй. Уыцы-иу рæстæг федералон министрæн Битары-фырт фехъусын кодта, дарддæр нæм вакцинацийы фæдыл куыст разæнгардæй кæй цæуы. Дзырдæн зæгъæм, ныртæккæ уал республикæмæ æрбаластой æрбаластой вакцинæйы 15 мины 262 иуæджы. Бæрнон кусджытæ зæрдиагæй кæнынц æмбарынгæнæн архайд дæр. Уæдæ республикæйы æнæниздзинад хъахъхъæныны 2021-2023 азтæн стратегийыл дæр кусын райдыдтой. Ацы хæс ис къабазы хуыздæр минæвæртты бæрны. Битарты Вячеслав æрхатыд Михаил Мурашкомæ, цæмæй нæм уыцы хъуыддаджы фæкæса. Республикæйы разамонæг ма дзырдта Цæгат Ирыстоны реанимацион службæйы райрæзтыл. Зæгъæм, Республикæйы клиникон рынчындоны хъуамæ фæзына ног хайад тæккæ ногдæр аппаратурæимæ. Дыууæ бæрнон кусæджы ныхасы сæр ма уыд нацпроект «Æнæниздзинадхъахъхъæнынад». Цæмæй йæ республикæйы æххæст кæной, уый тыххæй нын фарон федералон бюджетæй радтой 1 миллиард сомæй фылдæр. Адæмы æнæниздзинадмæ кæсыны тыххæй та Цæгат Ирыстоны сарæзтой 36 фелсырон-акушерон пункты. Хорз фæахъаз сты, уæлдайдæр дæрддзæф районты. Уæдæ ма рæхджы хъуамæ саразой æмæ сцалцæг кæной æнæниздзинады 10 кусæндоны дæр. Ацы аз та нацпроекты домæнтæ æххæст кæнынæн республикæ федералон бюджетæй райсдзæн 411 милуан сомæй фылдæр. Куыд сæ хардз кæндзысты, уымæ бæрнон цæстæй кæсдзæн республикæйы разамынд. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv