Фæсивæды Галуаны кадджын уавæры схорзæхджын кодтой фестиваль «Амыраны Рухс»-ы уæлахиздзауты

Фæсивæды Галуаны кадджын уавæры схорзæхджын кодтой ирон национ театрты фестиваль «Амыраны Рухс»-ы уæлахиздзауты. Ацы аз хуыздæртыл нымад æрцыдысты 70 адæймаджы. Се 'хсæн бынæттон æмæ республикон къæпхæны уæлахиздзаутæ. Хуыздæрты равзæрстой 6 номинацимæ гæсгæ. Пандемийæйы аххосæй ацы аз финал цыди дистанцион хуызы. «Амыран»-ы сценæйыл ногæй хъæлдзæг бæрæгбон. Фæсивæдон театры артисттæ арфæ кæнынц, аивады æппæтæй æвзыгъддæр чи разынди, уыдонæн. Фестиваль «Амыраны рухс»-ы уæлахиздзаутæн. Аивадон æркасты архайдтой 150 коллективы æмæ хицæн архайæджы. Æрбангом кодта авдсæдæ æрыгон артистæй фылдæр. Уыдысты, 7 азæй 30 азы онг кæуыл цæуы, ахæмтæ. Сæ арæхстдзинад æвдыстой 6 номинацийы - драмон спектакль, ирон аргъау, тексты аив каст, эстрадон-сатирикон миниатюрæ, фольклорон-театралон æвæрдтытæ æмæ сфæлдыстадон фæлварæн. Æрыгон артисттæн «Амыраны рухс» уарзон у. Уыдонæн сæ фылдæр фестивалы архайынц æрвылаз. Уæлдай хуыздæр сæхи цы районтæ равдыстой, уыдоны минæвæртты нæ республикæйы культурæйы министр Къубалты Эльбрус æмæ фæсивæды хъуыддæгты фæдыл комитеты сæрдар Джусойты Руслан схорзæхджын кодтой хицауады сæрдар Тускъаты Таймуразы арфæйы фыстæджытæй æмæ театр «Амыран»-ы дипломтæй. Фыццаг бынæттæй сæ фылдæр æрхауд Æрæфы районмæ. Сæрæн разындысты Кировы æмæ Дыгуры районты сфæлдыстадон къордтæ. Архайджыты сфæлдыстадон хъомысæн аргъ кодтой театры дæсны кусджытæ. Уыдон стыр арфæ ракодтой, æрыгон артистты ирон драматурги æмæ литературæмæ цы ахуыргæнджытæ æмхиц кæнынц, уыдонæн. Фæсивæдон театр йæ фестиваль снывонд кодта ирон драматурги æмæ театры бындурæвæрæг Брытъиаты Елбыздыхъойæн. Æвзарæн туртæ цыдысты 2 къæпхæнæй - районты æмæ республикæйы. Ацы аз кæд пандемийы аххосæй ивддзинæдтæ æрцыд æмæ финалы æвзарæн тур ацыди онлайн хуызы, уæддæр архайджыты нымæц уыди бирæ фылдæр. Хуыздæр архайджытæ бæрæггонд æрцыдысты видеоæрмæджыты руаджы. Сæ спектаклтæ æмæ театралон скъуыддзæгтæ хæдахуыр артисттæ равдыстой ирон æвзагыл. Уый уыд фестивалы сæйраг домæн. «Амыран»-ы куыд фæнысан кодтой, афтæмæй, хаттдзæгтæ кæнгæйæ, разыйæ баззадысты Ирыстоны фæсивæды аивадон æнтыстдзинæдтæй. «Амыраны рухс»-ы тæмæн ссыгъди алы районы минæвары цæсгомыл дæр. Финалы мадзæлттæ цыдысты Дзæуджыхъæуы фæсивæдон галуаны. Мадæлон æвзаг æмæ драматургийы райрæзмæ театр «Амыран» дарддæр дæр ахадгæ æвæрæн хæсдзæн, æмæ дызæрдыггаг нæу, ног цæхæрцæст актерты нæмттæ рæхджы кæй рабæрæг уыдзысты, уый.  _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv