Æппæтуæрæсеон адæмон фронты активисттæ федтой хъæуты медицинон куыстуæтты уавæр

Цалцæггон амбулаторитæ æмæ ног фелсырон-акушерон пункттæ. Республикæйы районты медицинæйы хæрзхъæддзинад хуыздæр кæны, медицинон æххуыс та æнцондæр. Ахæм уавæртæ арæзт цæуынц национ проект «Здравоохранение»-йы фæлгæты. Хъуыддагмæ сæ цæст дарынц æппæтуæрæсеон адæмон фронты уæнгтæ дæр. Ацы бонты абалц кодтой Рахизфарсы æмæ Горæтгæроны районтæм. Черменыхъæуы амбулатори цалцæггæнæн куыстыты фæстæ байгом кодтой 2 къуырийы размæ. Бæстыхай сарæзтой ивгъуыд æнусы 60-æм азты. Бынæттон цæрджыты ныхæстæм гæсгæ, уавæртæ дзы сæ хуыздæртæй нæ уыдысты. Медицинон бæстыхай кæй рацарæзтой, уымæй зæрдæ райы. Ныртæккæ дзæбæхгæнæндоны ис 11 агъуысты. Ифтонггонд у хъæугæ кусæнгæрзтæй. Уыимæ ма, бонæй уæвыны стационар дæр. Æппæтуæрæсеон адæмон фронты уæнгтæ федтой, цы уавæртæ дзы ис ныртæккæ, уый. Куыд рабæрæг, афтæмæй лабораторийы нæ фаг кæнынц хъæугæ кусæнгæрзтæ æмæ хостæ. Уыимæ ма йæ алфамблайы рæсугъдзинадыл дæр кæронмæ нæ бакуыстой. Амбулаторийы бæстыхайы ма ис тагъдæххуысы пункт. Æппæтуæрæсеон адæмон фронты уæнгтæ байхъуыстой кусджыты хъуыдытæм дæр. Æхсæнадон архайджытæ дарддæр абалц кодтой Раздзогмæ. Федтой фелсырон-акушерон пункт. Кусын райдыдта фарон. Активистты ныхæстæм гæсгæ, æппæт хъæугæ домæнтæн дзуапп дæтты. Кусынц дзы фелсыр æмæ медицинон хо. Рахизфарсы районы сæйраг рынчындоны специалисттæ сæм ссæуынц сæрмагонд фæткмæ æмæ цæрджыты курдиæттæм гæсгæ. Эксперттæ хатдзæгтæ арвитдзысты республикæйы æнæниздзинад хъахъхъæныны министрадмæ, уыимæ ма сæ фæнысан кæндзысты «Карта доступности медпомощи»-йы зæгъгæ. 2020 азы национ проект «Здравоохранение»-йы фæлгæты Цæгат Ирыстоны сарæзтой 36 фелсырон-акушерон пункты æмæ амбулаторийы. Æхсæнадон архайджытæ фæнд кæнынц фенын алкæй дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv