Мультипликацион киноныв «Маша и Медведь» ы дыккаг фæлтæр ратæлмац кодтой ирон æвзагмæ

Мультипликацион киноныв «Маша и Медведь»-ы дыккаг фæлтæр ратæлмац кодтой ирон æвзагмæ. Бахастой йæм 26 серийы. Раздæр уал хъæппæрисджын къорд иронау сдзурын кодта «Фиксик»-ты 5 серийы æмæ «Маша и Медведь»-ы фыццаг фæлтæр. Тæлмацгæнджытæ сæ фæндтыл сæ къух нæ исынц, архайынц уæлæмхасæн хъæлæс фыссыны хи студи саразыныл дæр. Сывæллæттæн уарзон мультипликацион кинонывтæ тæлмац кæныныл раздæр дæр куыстой, фæлæ сæрмагонд лицензион бындурыл уыцы куыст кæнын райдыдтой æрмæстдæр «Ирон федераци»-йы фæрцы. Сфæлдыстадон æгъдауæй æнцон нæу, уæдæ йыл æхца дæр дзæвгар хардз кæнын хъæуы. Æмæ кæд мульткинонывтыл кусæг артисттæм уыйас егъау домæнтæ нæ уыд, уæд уый зæгъæн нæ уыд кинонывыл бардарджытæй. Фыццаг уал фæсидтысты, йæ бон фæкæсын кæмæн у, уыцы адæммæ. Цы цонгдарæнтæ уæй кодтой, уыдонæй дæр сæм иучысыл æфтиаг хауд. Акцийы ном сæвæрдтой «Æ», зæгъгæ. Сфæлдыстадон къорды æмрæнхъ æрлæууыдысты, ирон æвзаг адджын кæмæн у, ахæм адæймæгтæ. Сæрмагонд бадзырд бафыстой Хуссар Ирыстоны ахуырад æмæ наукæйы министрадимæ. Уыдон тæлмацгонд киноныв парахат кæнынц ахуырадон кусæндæттыл. Ахæм бадзырдтæ ма «Ирон федерацийæн» ис Æрæфы, Дыгуры æмæ Æрыдоны районтимæ. Киноныв æвдыстой сывæллæтты рæвдауæндæтты æмæ райдиан скъолаты. Зæгъæн ис, æмæ дзы ахуыргæнджытæ пайда кодтой методикон æрмæджы хуызы. Фидæны уыцы куыст кæндзысты республикæйы иннæ районтимæ дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv