Амалхъомдзинадæн æххуысы центр «Мой бизнес» афæдзы дæргъы кусы республикæйы районты

«Мой бизнес», зæгъгæ, центртæ æнтыстджынæй кусынц Цæгат Ирыстоны районты. Сæ специалисттæ æххуыс кæнынц, амалхъомады йæхи бафæлварын кæй фæнды, уыдонæн куысты пълан саразынмæ. Нæ сæ ферох кæндзысты, адæм сæ фыццаг къахдзæфтæ куы акæной, уæддæр. Ахæм æххуыс чи райста, уыдонæй иу у нæ дарддæры æрмæджы хъайтар дæр. Нæ уацхæсджытæ йемæ сæмбæлынмæ араст сты Дыгуры районмæ. Аккеты Спартак у аразæг æмæ бирæсывæллонджын фыд. Цалдæр азы размæ сфæнд кодта хинкъалтæ кæнын йæ хæдзары. Райдыдта æхца æмбырд кæнын хъæугæ кусæнгæрзтæ балхæнынæн. Фæлæ бирæты хал ахордта - фæрæзтæ йын не сфаг ис. Йæ зонгæтæй Спартак фехъуыста, паддзахадимæ социалон бадзырд бафыссæн кæй ис, уый тыххæй. Бахатыд Дигорайы амалхъомдзинадæн æххуысы центрмæ. Æмбæлгæ гæххæттытæ сæмбырд кæнын æмæ куысты пълан саразынмæ нæлгоймагæн уым баххуыс кодтой. Специалистты зæрдæмæ йæ хъуыды фæцыд. Цы 250 мин сомы йын радих кодтой, уыдонæй балхæдта гæрзтæ. Рæхджы кусын райдайдзæн. Аккеты бинонтæ сты хæларзæрдæ. Архайдзысты иумæйаг тыхтæй. Сæ кусæнгæрзты адæймаджы æххуыс нæ хъæуы. Ис дзы хинкъалтæ кæнынæн аппарат, электрон фыдыссæн, хыссæзмæнтæн гарз æмæ уазалгæнæн. Фидæнмæ Спартакмæ бирæ фæндтæ ис. Хаццоны йæ фæнды кафе райсын, ныр йæ куыст æнæкъуылымпытæй куы ацæуа, уæд. Ныртæккæ амалхъомадæн æххуысы центртæ ис респуликæйы алы районы дæр. Уæвгæ та афæдзы дæргъы «Мой бизнес», зæгъгæ, центртæм æххуысагур æрбацыдысты 4 мин адæймагæй фылæдр. Цæгат Ирыстон у фыццаг регион, куыст ахæм хуызы кæм сæвæрдтой. Се `нтыстдзинæдтæ сын фæбæрæг кодтой Уæрæсейы экономикон рæзты министрады дæр. Банымадтой сæ хуыздæрыл. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv