Цæгат Ирыстоны ацыд æппæтуæрæсеон патриотон акци

Цæгат Ирыстоны абон ацыд æппæтуæрæсеон акци «Диктант Победы». Арæзт æрцыд парти «Иугонд Уæрæсе»-йы хъæппæрисæй. Æрвылаз сæ зонындзинæдтæ сбæрæг кæнын æмæ патриотон акцийы бацархайыны фæнд чи скæны, уыдоны нымæц фылдæрæй-фылдæр кæны. Диктант ныффысæн уыд куыд онлайн хуызы, афтæ сæрмагонд фæзты дæр. Ацы аз акци «Диктант Победы» ацыд республикæйы 59 фæзы. Архайдтой дзы кæй бафæндыд, уыдон. Диктант сарæзтой тесты хуызы. Фæрстытæ баст сты Фыдыбæстæйы Стыр хæст, хæстон кинонывтæ æмæ бæстæйы номдзыд æфсæддонты биоргафитимæ. Диктант фыстой 45 минуты дæргъы. Акци ацыд Майрæмададжы Суаргомы хъахъхъæнджыты музейы. Бынат хуымæтæджы нæ равзæрстой. Кавказыл тох кæронмæ ам æрхæццæ. Диктанты архайдта Гæздæнты 7 æфсымæртæй иуы фæдон. Сæ хъæбатырдзинады тыххæй канд республикæйы нæ, фæлæ æнæхъæн бæстæйы дæр зонынц. Акци расидтысты парти «Иугонд Уæрæсе»-йы минæвæрттæ. Регионалон хайады секретарь Ортабайты Тимур ныффыста диктант. Куыд зæгъы, афтæмæй бирæ ног хъуыддæгтæ базыдта. Диктанты хатдзæгтæм гæсгæ сбæрæг кæндзысты уæлахиздзауы. Хуыздæрæн 2022 азы фадат уыдзæн Мæскуыйы Уæлахизы парады бацархайын. Скъодзаутæй æнтыстджынæй йæхи чи равдиса, уыдонæн та уæлæмхасæн баллтæ бафтаудзысты паддзахадон фæлварæны бæрæггæнæнтæм. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv