Ковидæй чи фæрынчын, уыцы адæм цæуынц реабилитаци пульмонологийы республикон центры

Ковиды фæстиуджытæ æвзæры 'рдæм ахадынц адæмы психологон уавæрыл. Афтæ зæгъынц дохтыртæ. Алы рынчынæн дæр ис алыхуызон фæстиуджытæ. Реабилитацийы рæстæг дæр алкæмæн иухуызон нæу - ахæссы цалдæргай мæйтæ дæр. Ахсджиаг у психологон реабилитаци дæр. Сергей Ткачев йæ бинойнаг Зойæимæ ныр 2 къуырийы реабилитаци цæуынц Фыййагдоны центры. Ковид сыл стыхджын фарон, октябры. Бæрзонд температурæ, тыхджын хуыфæг æмæ зын улæфт. Тагъд æххуысы службæйы дохтыртæ сын сæ низы хатт сбæлвырд кодтой. Сæ рæуджытæ хъыгдард уыдысты 50%. Зоя æмæ Сергей уыцы бонтæ æрхæндæг зæрдæимæ æрхъуыды кæнынц. Дохтырты ныхæстæм гæсгæ, кæд адæймагæн йæ тæвд æрхауд æмæ хуыфгæ нал кæны, уæддæр уый ууыл дзурæг нæма у, æмæ кæронмæ сдзæбæх. Ацы низы фæстиуджытæ уæззау сты æмæ тагъд не суæгъд кæнынц адæймаджы. Хъыгдарынц ын канд йæ буар нæ, фæлæ ма æвзæрырдæм ахадынц адæймагæн йæ психологон уавæрыл дæр. Акъуаты Людмилæ дæр реабилитаци цæуы Ковид низы фæстæ. Æрвылбон тезгъогæнгæйæ улæфы сыгъдæг уæлдæфæй, нуазы хостæ. Йæхæдæг дохтырæй куыста æмæ йæ зоны, реабилитаци тынг хъæугæ кæй у, уæлдайдæр ацы низы фæстæ. Кæд низ уæззау хуызы ацыд, уæд реабилитацийы рæстæг, стæй уый фæстæ дæр ма иу цасдæр рæстæг адæймаг æнкъардзæн йæхи лæмæгъ, тагъд фæллайдзæн. Зын ын уыдзæн лæмбынæг архайд кæм хъæуы, ахæм куыстытæ кæнын. Тых улæфт нырма фæхъыгдары адæймаджы. Психологты ныхæстæм гæсгæ, ахæм уавæры æппынæдзух адæймаджы хъæуы йæ хиуæттимæ ныхас кæнын. Ковиды фæстæ реАбилитаци Фыййагдоны центры цæуынц 50 адæймагæй фылдæр. Ардæм æрбацæуынц Уæрæсейы алы регионтæй. Пульмонологийы республикон центрмæ ссæуынц республикон æмæ тагъд æххуысы клиникон рынчындæтты раздæры пациенттæ. Се 'ппæт дæр хуыфынц, тых улæфт кæнынц, вæййы сæм тæвд. Уæдæ хъыгдард баййафынц сæ нервытæ дæр. Дохтырты ныхæстæм гæсгæ, ам дзæбæхгæнæн мадзæлтты фæстæ се 'нæниздзинад фæхъæддыхдæр вæййы. Ковид низыл куы фæтых уай, уæддæр уый фæстæ æнæмæнг хъæуы реабилитаци ацæуын, фæдзæхсынц дохтыртæ. Адæмæн сæ æнæниздзинад алыхузыон у, уымæ гæсгæ дзæбæхгæнæн мадзæлттæ дæр иухуызон не сты. Гугкаты Иринæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv