Цæгат Ирыстоны райдыдта профессионалон дæсныйады чемпионат «Абилимпикс»

Дзæуджыхъæуы цæуы профессионалон дæсныйады чемпионат «Абилимпикс», йе `нæниздзинад хъыгдæрд кæмæн у, уыцы адæймæгты хсæн. Цæгат Ирыстоны цæуы 4-æм хатт. Ацы аз дзы 12 компетенцийы архайынц 87 адæймаджы. Дæсныйæдты нымæц азæй азмæ кæны фылдæр. Ацы аз сæм бафтыдтой текстыл бакусыны æмæ сфæлдыстадон дизайны компетенцитæ. Ерысты хи равдисынæн ис бирæ мадзæлттæ. Надгериты Ренатæ арӕхсы фæрдгуытæй алыхуызон зайæгойтæ æмæ цæрæгойты хуызӕн къухдарæнтæ аразынмæ. Кæд цæстæй æвзæр уыны, уæддæр чызджы уый нæ уромы - къухæй дæсны у. Æрыдоны аграрон-технологон колледжы студенткæ чемпионат «Абилимпикс»-ы фыццаг хатт нæ архайы. Ацы аз архайджытæ аразынц фæрдгуытæй дидинджытӕ. Хæслæвæрдтæ вæййынц алыхуызон. Михаловскæйы 16-æм профессионалон училищæйы 1-æм курсы студент Ислам Алексеев архайы чемпионаты фыццаг хатт. Ахуыр кæны хæринаггæнæджы дæсныйадыл, фæлæ йæ бафæндыд бафæлварын йæхи ацы хъуыддаджы дæр. Хæринаг цæттæ кæнынæй, ирон чъиритæ фыцынæй, фæрдгуытæй алыхуызон дзауматæ аразынӕй, хæдтулгæ цалцæг кæнынæй, быйынæй. Æдæппæтæй архайджытæ сæ арæхстдзинад æвдисдзысты 12 номинацийы. Скъоладзаутæн æмæ студенттæн æххуыс кæнынц 50 бархионы. Уыдон ацыдысты сæрмагонд ахуыртæ. Конкурсантты арæхстдзинадæн аргъ кæнынц 75 эксперты. Дзæуджыхъæуы 5-æм профессионалон училищæйы чемпионат байгом кодтой кадджын мадзалы хуызы. Архайджыты куыстытимæ базонгæ республикæйы ахуырад æмæ наукæйы министры хæдивæг Алыккаты Алан. Арфæйы ныхæстæ ракодта чемпионаты архайджытæн. Фæнысан кодта ахуыргæнджыты куыст дæр. Кæд сæ хъомылгæнинæгты æнæниздзинад хъыгдæрд у, уæддæр æдзух сты сæ уæлхъус æмæ сын æххуыс кæнынц сæхиуыл кусын æмæ сӕ фæлтæрддзинад бæрзонддæр кæнын. Ерысты хи равдисынæн арæзт æрцæуынц алы мадзæлттæ. Æрвылаз хъæздыг вæййынц цымыдисаг фембæлдтæй æмæ дæсныйадӕвдисæн ахуыртæй. Хъæппæрисджынты ныхæстæм гæсгæ, сты хорз ахъаз. Йе `нæниздзинад хъыгдæрд кæмæн у, уыцы адæймæгтæн дæттынц фадат бындурон фæлтæрддзинад райсынæн æмæ хорз куыст ссарынæн. Дзырд “Абилимпикс» тæлмацгондæй амоны «иухуызон гæнæнты олимпиадæ». Конкурс арӕзт у 2 къæпхæнæй. Регионалон чемпионаты уæлахиздзаутæ бацархайдзысты чемпионаты кæронбæттæны. Цæудзæн Мæскуыйы 23-æй 28-æм ноябрмæ. Чемпионаты сæ арæхстдзинад равдисдзысты 800 адæймагæй фылдæр нæ бæстæйы 84 регионæй. Хуыздæртæ хорзæхгонд æрцæудзысты кады гæххæттытæй æмæ æхцайы премитæй. Уымæй уæлдай ма, зæрдылдарæн лæвæрттæ æмæ сæрмагонд призтæй. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv