Цæгат Ирыстоны бындурон цалцæджы фиддонтæ октябры 58 проценты онг фæфылдæр сты

Цæгат Ирыстоны бындурон цалцæджы фиддонты бæрц октябры сси 58 проценты. Уый раздæры бæрæггæнæнтимæ абаргæйæ у зынгæ фылдæр. Сæрмагонд регионалон программæйы руаджы зилынц бирæфатерон хæдзæртты цартæ æмæ инженерон коммуникацитæм. Ацы аз бантыст 11 хæдзары снывыл кæнын. 29 ма сцалцæг кæндзысты ацы азы кæронмæ. Куыд цæуынц куыстытæ, уый федта нæ уацхæссæг Хуасдзауты Алинæ. Бæлвырддæр йæхæдæг радзурдзæн. Дзусы фырты номыл уынджы 22 хæдзарыл 30 азæй фылдæр цæуы. Уæдæй абонмæ бæстонæй цалцæггонд нæ уыд. Цæрджытæ хи хъарутæй хæдзары цар цалдæр хатты снывыл кодтой. Фæлæ уæддæр уыд бындуронæй базилинаг. Хæдзары цар ивын райдыдтой капиталон цалцæджы регионалон программæйы руаджы. Куыстытæм бавнæлдтой 3 къуырийы размæ. Ныридæгæн сын бантыст сæрмагонд парапет бетонæй скӕнын, цæмæй йын зæххæнкъуыстæй дæр тæс ма уа. Ног цар уыдзæн сатыры хуызы. Ныр уал æвæрынц хъæдæрмæгæй конструкцитæ. Балкъонты сæртæ дæр æрæхгæндзысты, цæмæй сæ уарынтæ ма хъыгдарой. Æдæппæтæй ацы аз бындурон цалцæджы программæйы фæлгæты сцалцæг кодтой 11 бирæфатерон хæдзары. Арæзтадон куыстытæ райдыдтой фарон. Раивтой дзы цар, сног кодтой коммуникацитæ. Архитектурон æмæ историон объекттæм чи хауы, уыцы хæдзæрттæн се 'ддаг бакастмæ дæр базылдысты. Зæгъæм, Миллеры уынгыл бирæфатерон хæдзæрттæ. Октябры бындурон цалцæгæн æмбырдгонд фæрæзтæ систы 58 проценты. Уый, раздæримæ абаргæйæ, у зынгæ фылдæр. 2019 азы 23 процентæй уæлдæр нæ уыдысты. Муниципалон скондты 'хсæн фыцццаг бынат ахсы Мæздæджы район. Фиддонты бæрц дзы 80 процентæй къаддæр нæ вæййы. Цæмæй бирæфатерон хæдзар бындурон цалцæджы хыгъдмæ бахауа, ууыл ахады хæдзары техникон уавæр, стæй фиддонты бæрц дæр. Гæнæн ис, æмæ куыстытæ фæткæй раздæр баххæст кæной. Уæд хъуамæ фиддонтæ 80 процентæй къаддæр ма уой. Ацы аз программæйы руаджы сцалцæг кæндзысты 29 хæдзары. 6 дзы сты Мæздæджы районы. Инæтæ та Дзæуджыхъæуы. Ацы аз программæмæ цы хæдзæрттæ бахаудысты, уым цалцæггæнæн куыстытæ фӕуыдзысты 2020 азы кæронмæ, кӕнӕ иннæ азы райдианы. Хуасдзауты Алинæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv