Æппæтуæрæсеон адæмон фронты уæнгтæ бабæрæг кодтой æхсæнадон бынæттæ

Цæгат Ирыстоны «Формирование комфортной городской среды» проекты фæлгæты аив кæнынц æхсæнадон бынæттæ æмæ бирæфатерон хæдзæртты кæртытæ. Куыстыты хæрзхъæддзинад бæрæг кæнынц Æппæтуæрæсеон адæмон фронты уæнгтæ. Абон та бабæрæг кодтой Уæллаг Фиагдон, Ногхъæу æмæ Бирæгъзæнг. Ног банæн бынæттæ, рухсдæттæн системæ æмæ урнæтæ. Ахæм фæлладуадзæн бынатмæ Уæллаг Фиагдоны цæрджытæ рагæй æнхъæлмæ кастысты. Арæзтадон куыстыты фылдæр хай æххæстгонд æрцыд. Хъæуы ма сывæллæттæн хъазæн фæз кæронмæ саразын. Æппæт мадзæлттæ дæр къухы бафтыдысты сæрмагонд федералон программæмæ гæсгæ. Куыстыты хæрзхъæддзинадмæ æппынæдзух сæ хъус дарынц цæрæнуæтты-коммуналон хæдзарады кусджытæ æмæ Æппæтуæрæсеон адæмон фронты активисттæ. Программæйы фæлгæты ма æхсæнадон бынæттæй уæлдай аив кæнынц бирæфатерон хæдзæртты кæртытæ дæр. Зæгъæм, ам ногæй баивтой асфальт. Сæвæрдтой дзы бордюртæ, бандæттæ. Бынæттон цæрджытæ ногдзинæдтæ нымайынц æцæг лæварыл. Æмæ кæд аивгæнæн куыстытæй цæрджытæ баззадысты разыйæ, уæд æхсæнадон архайджытæм та фарстатæ разынд. Æппæтуæрæсеон адæмон фронты уæнгтæ ма бабæрæг кодтой Ногхъæу. Бæлвырддæр та программæмæ гæсгæ цы цыртдзæвæнмæ базылдысты, уый. Куыстытæм фиппаинæгтæ нæ разынд. Уæдæ Бирæгъызæнджы дæр цæрджытæ сæ уæгъд рæстæг кæм арвитой ахæм бынат фæзынд. «Формирование городской среды» федералон проекты фæлгæты цы аивгæнæн куыстытæ баххæст кæнынц, уыдонмæ 5 азы дæргъы уыдзæн уæлдай цæстдард. Проекты райрæзтыл архайынц 2019 азæй фæстæмæ. 2024 азмæ фæнд кæнынц саив кæнын 30 мин æхсæнадон бынаты. Уыимæ ма горæты хæрзхъæддзинад 30% фæхуыздæр кæнын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv