Цæгат Ирыстоны цæрджытæн ис диспансеризаци ацæуыны фадат

Цæгат Ирыстоны цæрджытæн ис диспансеризаци ацæуыны фадат. Дохтыры æркаст фадат дæтты низ рагагъоммæ сбæрæг кæнын, уыимæ ма æнæниздзинад фæхъæддыхдæр кæнын. Пандемийæйы рæстæг диспансеризаци аиргъæвтой. Фæлæ ныр низ фæсаст, æмæ дохтырты æркаст ацæуæн ис, кæй фæнды уыдонæн. Бæлвырддæр нæ дарддæры æрмæджы. Хъæугæ медицинон иртæстытæ ацæуын, рагагъоммæ низ рабæрæг кæнын, кæнæ, æнæздзинадæн тас кæй ницæмæй у, уый сбæлвырд кæнын. Хуыбецты Надеждæйæн йе`нæниздзинад зæрæхсаинаг нæу, фæлæ йæ уæддæр бафæндыд диспансеризаци ацæуын. Ацы хъуыддагæн Дзæуджыхъæуы фыццæгæм поликлиникæйы снысан кодтой сæрмагонд бынат. Хайады ис, æрмæст программæйы фæлгæты дохтырты æркаст чи цæуы, уыдон. Ахæм хуызы ӕркасты сæ рады лæууын нæ бахъуыд. Диспансеризаци ацæуӕн ис алкӕмӕн дæр. Æрмæстдæр иу фиппайнаг: 18 азæй 39 азы онг кæуыл цæуы, уыдон медицинон æркаст цæуынц æртæ азы иу хатт, иннæтæ та - æрвылаз. Ацы мадзалы руаджы ис низ рагагъоммæ раиртасӕн. Диспансеризацийы размæ баххæст кæнын хъæуы анкетæ. Уый фæстæ дохтыртæм бацæуын. Кæд медицинон кусджыты зæрдæ диспансеризацийы архайæгмæ ахсайа, уæд ацæуын хъæудзæн дыккаг къæпхæн дæр. Æппæт ацы лæггæдтæй спайда кæнæн ис лæвар. Диспансеризаци хуымæтæг нæу. Йæ фæрцы бирæ низтæ ис рагагъоммæ сбæрæг кæнӕн. Дзырдæн зæгъæм, зæрдæйы æмæ рæуджыты низтæ, сæкæрниз æмæ онкологон низтæ дæр. Уымæй уæлдай-ма спайда кæнæн ис УЗИ-йæ дæр. Ацы къуыри Хицауады фембæлды рæстæг æнæниздинад хъахъхъæныны министры фыццаг хæдивæг Тебиаты Сослан куыд фæнысан кодта, афтæмæй ацы социалон лæгæдтæй спайда кодтой æрмæстдæр цæрджыты 18%. Уый у гыццыл бæрæггæнæн. Цæрджыты сразæнгард кæныны тыххæй æмæ, дæрддзæф рæтты чи цæры, уыдоны æхцондзинадæн ӕй æххæст кæнын райдайдзысты мобилон хуызы дæр. Уымæй уæлдай-ма, дзæбæхгæнæн уагдæттæ ифтонггонд æрцæудзысты сæрмагонд кусæнгæрзæй. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv