Информацион технологитæ æмæ бастдзинады управленийы æрдзырдтой интернеты тыгъдады цæстфæлдахджыты

Цæгат Ирыстоны информацион технологитæ æмæ бастдзинады управленийы уыд «Кибер-мошенничество. Смартфон, как оружие», зæгъгæ, брифинг. Журналистты фæрстытæн дзуæппытæ лæвæрдта управленийы разамонæг Сæлбиты Алан æмæ Мидхъуыддæгты министрады слестгæнæн управленийы разамонæг Теблойты Алан. Дзырдтой интернеты цæстфæлдахæн миты статистикæйыл, хи фæсаууонмæ фæлитой хъуыддæгтæй бахъахъхъæнын æмæ сæ ныхмæ арæзт профилактикæйыл. Сæлбиты Аланы ныхæстæм гæсгæ, интернеты тыгъдады арæхдæр сайд æрцæуынц ацæргæ адæм. Сæлбиты Алан, Цæгат Ирыстоны информацион технологитæ æмæ бастдзинады управленийы разамонæг: «Хи бæрæггæнæнтæ нымæцон дунейы сты нæ царды вазыгджын хай. Афтæ æнцонтæй мæнг хъусынгæнинæгты ахæсты бахауæм, æмæ йын зæгъæн дæр нæй. Цæстфæлдахджытæн арæх нæхæдæг дæр схъæр кæнæм сусæг информаци. Уый фæстæ нын уыдон нæ электрон чыссæтæ раафтид кæнынц. Цæмæй закъонхалджыты амæттæгтæ ма бауæм, уый тыххæй нæ хъæуы къæрцхъусдæр уæвын». Ивгъуыд азы æрцыд 500 мин барадхæлдæй фылдæр. Алы цыппæрæм дæр баст у интернеты тыгъдадимæ. Æппынæдзух аразæм профилактикон куыст. Цæрджытæн æрвитæм смс-хъусынгæнинæгтæ, уагхалджытæй хи куыд бахъахъæнæн ис, уыимæ байуарæм информацион сыфтæ. Теблойты Алан, Мидхъуыддæгты министрады слестгæнæн управленийы разамонæг: «Уæ телефонмæ цы СМС-хъусынгæнинаг æрбацæуа, уый, гæнæн ис, æмæ разына фæливæн ми. Уыцы фæтк фæстаг рæстæг тынг сарæх ис. Арæхдæр адæмы сайынц, цавæрдæр зынаргъ лæвар рамбылдтат, зæгъгæ, хабарæй. Цæмæй уыл ахæм сайд ма ’рцæуа, уый тыххæй макæмæн дзурут уæхи æмæ банчы бæрæггæнæнтæ, зæрдæхсаинаг хъусынгæнинæгтæн дæр дзуапп ма дæттут. Сайд уыл куы ’рцæуа, уæд та æвæстиатæй фехъусын кæнут пъалицæйы хайадæн». _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv