Цæгат Ирыстоны дарддæр æххæст кæынц мæгуырдзинадимæ тох кæныны программæ

Куыст ссарын, зæхх кæнæ фосы куыст кæнын райдайын. Ахæм хуызы æххуыс Цæгат Ирыстоны цæрджыты бон райсын у мæгуырдзинадимæ тох кæныны программæйы руаджы. Бацархайыны фæнд дзы чи скæны, уыимæ бафыссынц социалон контракт. Нæ дарддæры æрмæджы хъайтартæ программæйы фæлгæты ссардтой куысты бынæттæ. Сæ мыздимæ ма 4 мæйы дæргъы исдзысты паддзахадон фиддонтæ. Хъаирты Лимæ 6 мæйæ фылдæр агуырдта куыст. Алыхуызон сайтты, газетты касти ваканситæм. Йæ зонгæтæн дæр-иу афæдзæхста. Фæлæ йæ къухы ницы æфтыд. Уый фæстæ æххуысагур фæсидт Æрæфы районы куыстдæттыны комитетмæ. Йæхи бафыста хыгъды. Сылгоймагимæ «Мæгуырдзинадимæ тохы» программæйы фæлгæты бафыстой социалон контракт. Хъæугæ гæххæттытæ куы æрымбырд кодта, уæд ын куысты бынат дæр снысан кодтой. Ныртæккæ Хæзныдоны хуыйæн фабрикæйы фыдæбон кæны хуыйæгæй. Хæзныдоны хуыйæн фабрикæйы социалон контрактмæ гæсгæ кусы 11 сылгоймаджы. Ныридæгæн ма æнхъæлмæ кæсынц цыппармæ. Разамынды ныхæстæм гæсгæ, ног кусджытæй разы сты. Программæйы æнтыстджын архайдӕн йӕ иу дæнцæг Будайты Зæлинæ. Уый сæрмагонд проектмæ гæсгæ йæ дæсныйадмæ гæсгæ ссардта куысты бынат. У социалон педагог. Куыд радзырдта, афтæмæй йæ куысты бынат куы фесæфта, уæд йæхи фæлвæрдта исты зӕрдӕмӕдзӕугӕ куыст ссарыны. Уымæ гæсгæ слæууыд куыстдæттыны комитеты сæрмагонд хыгъды. Куыст ссарыны социалон контракт у комкоммæ æххуысы хуызтæй иу. Программæйы архайджытæ исынц паддзахадон æххуыс. Мыздмæ ма æрвылмæйон фиддон 10 мин æмæ 599 сомы 4 мæйы дæргъы. Ныридæгæн Цæгат Ирыстоны куыстдæттыны комитет социалон контракттæм гæсгæ куысты бынæттæ ссардта 142 адæймагæн. Программæйы бацархайыны тыххæй республикæйы цæрджытæ хъуамæ курдиат бадӕттой куыстдæттыны комитетмæ. Уыимæ ма сæ хъуамæ банымайой æххуысцухыл. Контракт бафыссынц 9 мæйы æмгъуыдмæ. Уазиты Зæлинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv