Цæгат Ирыстоны æхсæз ахуыргæнæджы райстой президенты номыл премитæ

Цæгат Ирыстоны æхсæз ахуыргæнæджы райстой президенты номыл премитæ. Дзæуджыхъæуы ахуырад æмæ наукæйы министрады сбæрæг кодтой хуыздæр ахуыргæнджыты. Конкурс сарæзтой Уæрæсейы президенты уынаффæмæ гæсгæ. Архайджыты регистраци кодтой 27-æм апрелæй 27-æм маймæ. 5-æм июны та райдыдта æвзарæн къæпхæн. Уæлахиздзауты сбæрæг кодтой сæрмагонд къорды уæнгтæ. Се `хсæн ахуырадон организациты разамонджытæ, профцæдисты минæвæрттæ æмæ ныййарджытæ. Æхсæз хуыздæр ахуыргæнæджы райстой фæйнæ 200 мин сомы. Уæлахиздзауты `хсæн Архонкæйы 2-æм скъолайы англисаг æвзаджы ахуыргæнæг Кобылты Зæлинæ, Камбилеевкæйы 1-æм скъолайы райдиан кълæсты ахуыргæнæг Олеся Маслова, Беслæны 6-æм скъолайы уырыссаг æвзаг æмæ литературæйы ахуыргæнæг Мæрзойты Аннæ, Дзæуджыхъæуы 50-æм скъолайы математикæйы ахуыргæнæг Гуцунаты Ритæ, Дигорайы 2-æм скъолайы немыцаг æвзаджы ахуыргæнæг Хадаты Светланæ æмæ Алагиры 3-æм скъолайы математикæйы ахуыргæнæг Баситы Мæдинæ. Республикæйы ахуырад æмæ наукæйы национ ахуырады хайады сæргълæууæг Нæкуысаты Иринæ куыд бафиппайдта, афтæмæй хуыздæр ахуыргæнджытæн премитæ лæвæрд æрцыдысты Уæрæсейы рухстауыны министрады хъæппæрисæй. Ахуыргæнджытæ премитæ хъуамæ райсой 5-æм октябрмæ. Конкурсы финалисттæ систы Алагиры 5-æм скъолайы физикæйы ахуыргæнæг Хъараты Маринæ, Камбилеевкæйы 1-æм скъолайы физикæйы ахуыргæнæг Александра Рыжова, Алагиры 3-æм скъолайы англисаг æвзаджы ахуыргæнæг Чихтисты Роксанæ. Уыдон иууылдæр райстой премитæ, фæйнæ 20 мины. Конкурсы бацархайдтой æртæ азæй фылдæр чи кусы æмæ къуыри 18 сахаты кæмæ ис, уыцы ахуыргæнджытæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv