Оперативон штабы æмбырды æрдзырдтой эпидемиологон уавæрыл

Цæгат Ирыстоны омикрон-штамм кæмæ рабæрæг, уыдоны нымæц 20-мæ схызт. Уый тыххæй республикæйы сæйраг санитарон дохтыр Тыбылты Алан фехъусын кодта оперативон штабы æмбырды. Ацыд Сергей Меняйлойы разамындæй. Уæрæсейы фæлхасгæнджытæм цæстдарды управленийæ куыд фехъусын кодтой, афтæмæй коронавирус кæмæ рабæрæг, уыдоны нымæц 5 бонмæ сырæзт 10,5% бæрц. Къуырийы дæргъы республикæмæ фæхæццæ кæндзысты омикрон-штамм бæрæг кæнынæн тестытæ. Сергей Меняйлойы ныхæстæм гæсгæ, лабораторитæ хъуамæ кусой дзаг тыхтæй. Æнæниздзинад хъахъхъæнынады министр Тебиаты Сосланы ныхæстæм гæсгæ, тагъд медицинон æххуыс суткæмæ бахъæуы 884 адæймаджы. Ныртæккæ Цæгат Ирыстоны медицинон уагдæтты коронавирусæй дзæбæх кæнынæн ис 768 бынаты. Уыдонæй 34% сты уæгъд. Профилон министрадæй куыд фехъусын кодтой, афтæмæй хæстæгдæр бонты Тагъд æххуысы клиникон рынчындоны туаггуыры станцæйы арæзтадмæ бавналдзысты. Уый тыххæй æппæт хъæугæ ифтонггæрзтæ дæр ис. Ныхас цыд вакцинацийыл дæр. Ацыдысты йæ республикæйы цæрджыты 47%. Ковид æмæ æхснырсæгæй рынчынтæ фæфылдæр сты сывæллæтты 'хсæн дæр. Ныртæккæ сывæллæтты клиникон рынчындоны ис 57 пациенты. Ахуырад æмæ наукæйы министрады хъусынгæнинагмæ гæсгæ, ныртæккæ республикæйы 67 къласы сты æхгæд карантины. Регионы разамонæг бабар кодта ахуырады системæ дистанцион архайдмæ бацæттæ кæнын. Цæмæй бахъуаджы рæстæг къуылымпыдзинæдтæ ма фæзына. Оперативон штабы ма куыд фæнысан кодтой, афтæмæй эпидемиологон уавæры тыххæй ковиды фæстæ реабилитаци рæстæгмæ бауромдзысты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv