Цхинвалы медицинон центры сывӕллӕтты рынчындоны фӕфылдӕр кодтой бынӕттӕ коронавирусӕй рынчынтӕн

Цхинвалы республикон бирæкъабазджын медицинон центры сывæллæтты рынчындоны фæфылдæр кодтой бынæттæ коронавирусæй рынчынтæн. Уый тыххæй фехъусын кодта рынчындоны сæйраг дохтыр Биченты Индирæ. Уæлæмхасæн бынæттӕ уал скодтой сывæллæтты рынчындоны. Фæстаг дыууæ суткæмæ дзы фæзынд 45 бынаты. Абоны онг дзы рынчынтæ ис 156. Биченты Индирæ куыд фæнысан кодта, афтæмæй стационары рынчынты æвæрынц бæрзонд буары тæвдимæ æмæ компьютерон томографийы бæрæггæнæнтæм гæсгæ. Хуссар Ирыстоны коронавирусæй рынчынтыл æфтын байдыдта, Уæрæсеимæ арæнтæ куы байгом сты, уæд. Уымæй размæ республикæмæ бацæуыны агъоммæ хъуамæ бæлццæттæ дыууæ къуырийы бæрц фæбадтаиккой карантины. Ацы фæткы фæрцы 5 мæймæ Хуссар Ирыстоны рабæрæг кодтой 90 рынчыны. Карантины фæстæ республикæйы рынчынты нымæц схызт 800-мæ, 11 дзы амардысты. Къуырисæрæй республикæйы хицауад ахуырадон, хиирхæфсæн æмæ спортивон уагдæтты куыст ӕрлæууын кодта 15 ноябры онг. Ӕрæджы, сырх зонæйы цы дохтыртæ кусынц, уыдонæн баххуыс кæнынмæ Санкт-Петербургӕй æрцыдысты наукон-клиникон центры специалисттæ дæр. Уæрæсейы æфсæддонты госпиталы Хуссар Ирыстоны ныртæккæ ис коронавирусæй 32 рынчыны. Исынц æмбæлгæ медицинон æххуыс. Бирæвæрсыг æфсæддон госпиталы ис хъæугæ кусæнгæрзтæ - рæуджытæ улæфынгæнæн аппараттæ, пациенттæм цæстдарды монитортæ, рентген æмæ УЗИ-йы гæрзтæ, туджы æмæ коронавирусы ирæстыты лаборатори. Уæрæсейы æфсæддонтæ Хуссар Ирыстонмæ æрцыдысты пандемийы рæстæг адæмæн баххуыс кæнынæн. Мобилон рынчындоны ис 100 бынаты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv