Мыстулаты Иринæйы мысæн изæр ацыд Æрыдоны. Мадзал сбастой курдиатджын фæндырдзæгъдæг, композитор æмæ ахуыргæнæджы 80 азы бонимæ. Уæрæсейы сгуыхт артисткæйы ном ссарынмæ Æрыдоны районы культурæйы галуанмæ æрбамбырд сты йæ хиуæттæ, йе ‘мкусджытæ, йæ хъомылгæнинæгтæ, йе сфæлдыстадæн ын стыр аргъ чи кæны, уыдон. Уазджытæн фадат уыд йæ номыл кинонывмæ бакæсын. Сценæйæ зæлыдысты Мыстулаты Иринæйы тыххæй мысинæгтæ. Сæ уарзон ахуыргæнæджы кад дарддæр чи хæццæ кæыны, уыцы артисттæ: Дзуццаты Сослан, Хуытыгаты Маринæ, Хъуысаты Сослан, Илурты Риммæ æмæ иннæтæ акодтой, Мыстулаты Иринæ кæй ныффыста æмæ йын йæхи номыл цы уацмыстæ ныффыстой, уыдон.