Цæгат Ирыстоны дарддæр аразынц фелсырон-акушерон пункттæ

Фыццаг медицинон æххуысы мадзæлттæ Цæгат Ирыстоны хъуамæ уой бæрзонд æмвæзадыл. Уæлдайдæр районты æмæ дæрддзæф хъæуты. Ахæм хæс йæ размæ æвæры республикæйы разамынд. Иуæй-иу амбулаториты уавæр уыд зæрдæхсаинаг. Нацпроекты фæрцы арæзт æрцыд ног фелсырон-акушерон пункттæ. Хæстæгдæр рæстæг ма сыл бафтдзæн. Ног кабинеты ныридæгæн æрбынæттон сты. Баззад ма фæстаг хæслæвæрдтæ бакæнын, рынчынты медицинон картæтæ тæрхæджытыл равæрын æмæ документаци бапълан кæнын. Алханчурты хъæуы йæ дуæрттæ абон-райсом байтындздзæн, нырыккон домæнтæн дзуапдæттæг фелсырон-акушерон пункт. Уымæ тынг зæрдиагæй æнхъæлмæ кæсынц бынæттон цæрджытæ иууылдæр. Раздæр цы уавæрты куыстой, уый дохтыртæ æвзæр фынау æрхъуыды кæнынц. Амбулатори йæ куыст кодта зæронд æмдзæрæны бæстыхайы. Архайдтой, кæрæдзийы сæртыл лæугæйæ, бынат нæ фаг кодта, уыимæ сæм хъæугæ кусæнгарз дæр нæ уыд. Хуымæтæг фадæттæ дæр дзы нæ уыд. Ног фелсырон-акушерон пунктимæ хъуыддаг аивта. Ам ис алы хуызы фыццаг медицинон æххуыс бацагурын. Ифтонг у ног кусæнгæрзтæй, ис дзы æвæстиатон æххуысæн æппæт уавæртæ. Фидæны бæстыхайы кусдзæн «БАРС» информацион системæ дæр. Ног фелсырон-акушерон пункттыл Цæгат Ирыстоны цин кæнынц бирæ хъæуты. Бирæ азты дæргъы уый уыд чысыл хъæутæн сæ риссагдæр æмæ зæрдæхсаинагдæр фарста. Иуæй-иуты та дзы ахæм бæстыхай уæвгæ дæр нæ уыд. «Æнæниздзинад хъахъхъæнын» -ы нацпроекты руаджы фыццаг медицинон-санитарон æххуыс бакæныны системæ республикæйы хуыздæр кæны. «Æнæниздзинад хъахъхъæнын»-ы проектмæ гæсгæ, 2020 азы Цæгат Ирыстоны фæзынд 36 ног фелсырон-акушерон æмæ фелсырон пункты. Иу дзы байгом Цымийы хъæуы, 2 Æрыдоны районы, 7 Æрæфы. Æппæты фылдæр ног мединон бæстыхайы сарæзтой Мæздæджы районы. Растдæр зæгъгæйæ та - 16. Зæгъын хъæуы уый, æмæ дæрддзæф районмæ республикæйы разамынд дары уæлдай æргом. Алагиры районы сæ дуæртæ байтыгътой æртæ ахæм пункты, Горæтгæрон районы – 6, Рахизфарсы та иу фелсырон-акушерон пункт. Æхцайы фæрæзтæй куыстытыл схардз кодтой 219 млрд сомæй фылдæр. Куыстыты хæрзхъæддзинадмæ лæмбынæгæй каст хицауады сæрдары хæстæ рæстæгмæ æххæстгæнæг Тускъаты Таймураз. Дзуапдæттæг министрадтимæ алы къуыри дæр цыд кусæг балцы. Сæйраг домæн — арæзтады æмгъуыд æмæ объектты цалцæггæнæн куыстыты æмбæлгæ уагыл конд. Къуылымпытæ фæзынд Комгæроны. Уым кусджыты архайды рабæрæг кодтой аиппытæ. Зындзинæдтæ æмæ фарстатæ фæзыны, хæххон æмæ дæрддзæф хъæуты цы амбулаторитæ аразынц, уым дæр. Медикон-санитарон фыццаг æххуысы объекттæ араздзысты ацы аз дæр. Рацараздзысты, кæлæддзаг уавæры чи уыд, 4 ахæм бæстыхайы: Къостайыхъæу, Хумæллæг, Рамоново æмæ Мацутæйы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv