Парти «Иугонд Уæрæсе» йы минвæрттæ сбæрæг кодтой скъолаты хæрæндæтты уавæр

Скъолаты тæвд хæринаджы уавæрмæ сæ хъус æрдардтой парти «Иугонд Уæрæсе»-йы уæнгтæ дæр. Ахæм хæс сын сæ размæ сæвæрдта республикæйы сæргълæууæг Битарты Вячеслав. Партийы депутаттæ федтой Заводы поселоччы скъолаты хæрæндæтты уавæр. 31-æм скъолайы сывæллæтты аходæн райдайы 1-æм урокы фæстæ. Фыццаг саходынц райдиан кълæсты сабитæ. Уый фæстæ, куыд кæстæрæй, радыгай цæуынц хæрæндонмæ. 5-æм урокы фæстæ та лæвар бахæрынц, бирæсывæллонджын æмæ æххуысцух бинонтæй цы скъоладзаутæ сты, уыдон. Хæринæгтæ алыбон сты алыхуызон. Иумæйаг менюмæ гæсгæ дзы абон ис дзул, сауфагæ, дзидз, айк, нæлхæ æмæ цай. Алцыдæр - хæрзад æмæ хъарм. Цæттæ сæ кæнынц скъолайæн йæхи мидæг. Къамис бабæрæг кодта Заводы поселоччы 34-æм скъола дæр. Ам дæр æркастысты уавæрмæ. Фыццаджыдæр федтой хæрæндон. Дзуапп дæтты æппæт санитарон домæнтæн дæр. Уæдæ хæринаг дæр адæй федтой. Сабитæ сæ аходæнæй разы сты æви нæ, уый сæ бафарстой. Сывæллæттæ цы хæрынц æмæ цавæр уавæрты, уый æппынæдзух бæрæг кæнынц ныййарджытæ дæр. Ныридæгæн сæм фиппайнæгтæ нæй. Ацы скъолайы сывæллæттæн аходæн вæййы æртыккаг урокы фæстæ. Æмткæй райсгæйæ сихоры хæрд бакæнынц 324 скъоладзауы. Хæрæндæтты куысты фæткмæ æмæ хæринæгты хæрзхъæддзинадмæ къамисы уæнгтæ аиппытæ не рхастой. Басгæрст рауад лæмбынæг. Фæлæ 31-æм скъолайы лыстæг райхалинаг хъуыддаг разынд. Цæгат Ирыстоны сæргълæууæг Битарты Вячеслав бабар кодта ахæм æнæнхъæлæджы рейдтæ æппынæдзух аразын. Афтæмæй парти «Иугонд Уæрæсе»-йы уæнгтæ басгæрсты рацæуынц къуыри иу хатт. Пелиты Сабинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv