Футболы академи «Алани»-йы командæ фæуæлахиз Цæгат Кавказы федералон зылды ерысты

Фарон фæззæджы Цæгат Ирыстоны йæ дуæрттæ байгом кодта футболы академи «Алани». Нæ республикæйы цæрджытæ йæм рагæй æнхъæлмæ кастысты, сси сын æхсызгон лæвар. Академи æрбангом кодта нæ республикæйы спортивон скъолаты хуыздæр минæвæртты. Ныр афæдзы 'рдæг ам футболисттæ сæ фæлтæрддзинад уæлдæр кæнынц. Уæдæ сын æнтыстдзинæдтæ дæр ис. Футболы академи байгом фарон августы. Ныридæгæн сты æнтыстджын. Æрæджы уыд Цæгат Кавказы федералон зылды футболæй ерыстæ. Уым футболон къорд «Алани»-йы 2004 азы гуыр футболисттæ сæхи равдыстой иттæг хорз. Ацы лæппуты цалдæр мæйы размæ æрбамбырд кодтой нæ республикæйы спортивон скъолатæй. Цыбыр рæстæгмæ кæрæдзиуыл систы æнувыд, æмдыхæй спорты бæрзæндтæм тырнынц. Къорды капитаны ныхæстæм гæсгæ, сæ ныхмæлæууджытæн ныхкъуырд раттын уыд зын, фæлæ фæуæлахиз уæвын сæ къухы бафтыд,уый та сын уæлдай æхсызгон у. Футболон академийи домæнтæн дзуапп дæтты. Ам йæ хъомылгæнинæгтæн сарæзтой æппæт уавæртæ дæр. Ис дзы хъæугæ кусæнгæрзтæ, уæлæдарæс, æмраст цъæхфæлыст бынæттæ, цæрынæн æнцонвадат уавæртæ. Уымæй уæлдай-ма, хъомылгæнинӕгтимæ куыст у, куыд æмбæлы, афтæ. Кæд ерысты фæстиуджытæ зæрдæмæдзæугæ разындысты, уæддæр къорды разамонæг ӕххӕст цин нӕ кӕны. Ис-ма дзы бакусинæгтæ. Академийы æнтыстдзинӕдтæм егъау æвæрæн бахæссынц дæсны тренертæ. Уыдон æрвылбон дæр ахуыр кæнынц, сæ фæлтæрддзинад уæлдæр кæныныл архайынц, стыр æххуыс сын сты раззагдæр специалистты амындтытæ. Разæнгард сæ кæны иумӕйаг хъуыды-иуыл курдиатджындæр футболисттæ хъуамæ сæ арæхстдзинад æвдисой нæ республикæйы сæйраг командæйы. Ноджы-ма æртæ командæйы Цæгат Кавказы федералон зылды футболæй ерысты финалмæ рацыдысты. Æрдæг финалы футболон командæйы 2005 азы гуырд спортсментæ фембæлдысты се`мгæрттимæ Грознайæ. Дыууæ фембæлды дæр ахицæн сты хæрæгсастæй. Уазæгуаты 2:2 нымадæй, ам та 0:0 хыгъдæй, фæлæ уæддæр нæ командæйы къухы бафтыд размæ рацæуын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv