Цæгат Ирыстоны цæуынц кæронбæттæны ерыстæ чъиритæ фыцыны компетенцийы

Ирон чъиритæ скæнын æппæт домæнтæ æххæст кæнгæйæ. Хъуамæ сæ æттаг бакаст, сæ уæз, æмæ сæ адмæ фау æрхæссæн ма уа. Æрыдоны æртæ боны дæргъы хуыздæр чъирифыцæджы номыл тох кодтой архайджытæ Уæрæсейы 19 регионæй. Афæдз размæ дæр ма Голоты Сабинæ чъиритæ фыцын фæлвæрдта æрмæст бинонты 'хсæн. Абон та йæ арæхстдзинад æвдисы æппæтуæрæсеон ерысты. Æхсæрдæсаздзыд чызг домæнтæ иууылдæр хорз зоны. Сæйрагдæрыл ацы хъуыддаджы нымайы - хорз зæрдæйы ахастимæ архайын. Голоты Сабинæ, Дзæуджыхъæуы базарадон-экономикон техникумы студенткæ: «Бацæттæ кодтон 6 æртæдзыхоны, насджын, къабускъаджын æмæ фыдджын, уыимæ ма ӕнгузимӕ хъæдурджын. Рæстæг нын лæвæрд уыди фондз сахаты. Мæнмæ гæсгæ, алцыдæр скодтон раст æмæ афойнадыл». Цæгат Ирыстон æрбамбырд кодта æрыгон хæринаггæнджыты Уæрæсейы 19 регионæй. Се 'хсæн Перм, Мæскуы æмæ суанг Сыбыры минæвæрттæ. Нæ бæстæйы ирон чъиритæ кæм нæ уарзынц, иу ахæм бынат нæй. Алексей Парашкович, Сургуты политехникон колледжы студент: «Мæхи цæттæ кæнын райдыдтон сентябры кæрон. Алы бон дæр-иу скодтон аст-дыууадæс уӕлибӕхы. Æдæппæтæй, чи зоны, алы хуызы ирон чЬиритӕ сфыхтон минӕй фылдæры бӕрц». Жюри, бæрæггæнæнтæ æвæргæйæ, кæсы алы лыстæгдзинадмæ. Хыссæйы хъæд ӕмӕ санитарон домæнтæм, цæттæ кæрдзыны уæзмæ. Æртæдзыхон хъуамæ уа 600 граммы, чъирийы уæз та 900 граммы. Хаттдзæгтæм гæсгæ, хъуамæ алы архайæг дæр æрæмбырд кӕна 100 баллы онг. Алла Столбовская, жюрийы уæнг: «Архайджытæ хъуамæ скæной 5 æрмæст хыссæйы хуызтæ. Уæлдай цæстдард сыгъдæгдзинадмæ дæр. Уый ахсджиаг у хæринаг кæнгæйæ. Уæдæ ад, йе 'ддаг бакаст æмæ иннæ сæйраг домæнтæ дæр хъуамæ уой бæрзонд æмвæзадыл». Ерыстæ цыдысты æртæ боны дæргъы. Уыцы рæстæгмæ архайджытæ скодтой чъириты æппæт хуызтæ дæр. Уæлибæх, картофджын, балджын, фыдджын æмæ æндæртæ. Студенттæ сæ арæхстдзинад æнтыстджынæй равдыстой. Жюри цалдæр бонмæ скæндзæн хатдзæгтæ, хуыздæр æрыгон чъирифыцæджы ном мах дæр уæд базондзыстæм. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv