Вакцинацийы мобилон къордтæ адæмæн прививкæтæ кæнынц сæ куысты æмæ ахуыры бынæтты

Цæгат Ирыстоны дарддæр тох кæнынц COVID-ы ныхмæ. Гом кæнынц вакцинацигæнæн пункттæ. Ныртæккæ кусынц 12 медицинон пункты.  Дзæуджыхъæуы 1, 4 æмæ 7 поликлиникæтæ, Æфсæнвæндаджы рынчындон. Уымæй уæлдай ма æппæт районты поликлиникæтæ дæр. Цæрджыты æнцойдзинадæн Æнæниздзинад хъахъхъæныны министрад сарæзта вакцинацийы мобилон къортæ. Уыдон адæмæн прививкæтæ кæнынц сæ куысты æмæ ахуыры бынæтты. Ахæм уавæрты вакцинæ скæнын кæй фæнды, уыдон гыццыл не сты. Завод «Радугæ»-йы æмæ Тарниз дзæбæхгæнæн диспансеры вакцинаци куыд ацыд, уый федта Дзæдзойты Фатимæ. Фыццаг уал æнæмæнгæй хъæуы медицинон æркаст ацæуын. Уый фæстæ анкетæ баххæст кæнын. Дохтыртæ бæрæг кæнынц тарниз дзæбæхгæнæн диспансеры кусджыты æнæниздзинады уавæр – туджы æлхъывдад, буары тæвд. Медицинон кусджыты ныхæстæм гæсгæ, вакцинæ Гам-Ковид-Вакы ахадындзинад у 95%-æй фылдæр. Вакцинæ фыццаг райста рынчындоны сæйраг дохтыр Кобесты Николай. Куыд зæгъы, афтæмæй йын æхсызгон у, кæй ис ацы хъуыддаг бакæнæн, рынчынты дзæбæх кæнынæй хи ма фæиппæрд кæнгæйæ. Сæйраг дохтыримæ иумæ се `нæниздзинад фæфидар кæнынмæ æрбацыдысты йе `мкусджытæ дæр. Æдæппæтæй сты 20-æй. Ацы рынчындоны кусджытæй бирæтæ прививкæ скодтой раздæр дæр, сæхи развæлгъау паддзахадон лæггæдты порталы ныффысгæйæ. Вакцинаци сын кæнынц 1-æм поликлиникæйы. Уыцы иу рæстæг ма горæты 3-æм поликлиникæйы вакцинаци кæнынц завод «Радугæ»-йы кусджытæн. Бирæты прививкæ скæнын рагæй фæндыд. Ам дæр абон вакцинæйы 1-аг хай скодтой 20 адæймагæн. Семæ заводы хайады разамонæг дæр. Ацы хъуыддагыл хъуыды кодта, вакцинацийы тыххæй фыццаг хъусынгæнинæгтæ куы фæхъуыста, уæдæй. Вакцинацийы мобилон къордтæ ма цæудзысты дæрддзæф хъæутæм дæр. Уый фæрцы йе `нæниздзинад фæфидар кæныны фадат уыдзæн алкæмæндæр. Республиикæмæ Гам-Ковид-Вак ласын куы райдыдтой, уæдæй райстам 11 262 комлекты. Ныридæгæн æй скодтой 5 395 адæймагæн. Прививкæ скæна æви нæ, уый у алы адæймагæн дæр йæхи бар. У барвæндон хъуыддаг æмæ лæвар. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv