Проектон офисы æмбырды æрныхас кодтой кæсагдарыны æмæ дзидзайæ конд продукцийыл бакусыны проекттыл

Кæсагдарыны æмæ фосдарыны куысты рæзтыл абон æрныхас кодтой проектон офисы радон æмбырды. Республикæйы сараздзысты æмбæлгæ уавæртæ дзидзайæ конд продукцийыл бакусынæн. Кондад райдайынæн бахъæудзæн 13 милуан сомы. Хæдзарад «Форель Осетии» кусын райдыдта 2016 азы. Куыстуат ифтонг кæны кæсаджы лæппынтæй республикæйы хæдзарæдтæ. Компани кусы еугæфы кондадыл дæр. Продукцийæн стыр аргъ кæнынц базарады. Ивгъуыд азы бантыст 6 тоннæйы ауæй кæнын. Фидæны фæнд кæнынц кондады гæнæнтæ фæуæрæхдæр кæнын. Уымæн та бахъæудзæн уæлæмхасæн фæрæзтæ. Абоны онг компани куыста хи фæрæзты руаджы. Битарты Вячеславы ныхæстæм гæсгæ кæсагдарыны куысты райрæзт у республикæйы раззагдæр проекттæй иу. Сæргълæууæг бахæс кодта, хæдзарадæн баххуыс кæнын. Куыд паддзахадон гæнæнтæй, афтæ инвесторты руаджы дæр. Цæгат Ирыстон 2020 азы бæрæггæнæнтæм гæсгæ фосдарыны куысты рæзты Уæрæсейы регионты 'хсæн бацахста дыккаг бынат. Уымæ гæсгæ дзидзайæ конд продукцийыл бакусын у раззагдæр фарстатæй иу. Къуылымпытимæ æмбæлынц куыд егъау, афтæ чысыл хæдзарæдтæ дæр. Стурты барæй æргæвдын куы бахъæуы,уæд дзидзайы аргъ фæкъаддæр вæййы. Йæ хæрзхъæддзинадыл нæ сахады. Куыстуат «Карагро»-йы бындурыл сараздзысты уавæртæ дзидзайæ конд продукцийыл бакусынæн. Ныридæгæн дзы ис цех æмæ æргæвдынæн бынат, стæй уазалгæнæнтæ. Кондад фæцалх кæнынæн бахъæудзæн 13 милуан сомы. Дарддæр архайынц мыддарджыты ассоциаци саразыныл. Хъæууон-хæдзарадон кооператив саразынæн хъæуы зæхх 5 гектары фæзуатæй. Кооператив уал ныридæгæн райста регистрацийы æвдисæндар. Экономикæйы райрæзты министрадимæ иумæйагæй куыст цæуы кредит райсыны фарстайыл. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv