Цæгат Ирыстоны, æхсæнадон бынæттæм цæугæйæ, QR-код нал хъæудзæн

Æхсæнадон бынæттæм цæугæйæ, QR-код нал хъæуы. Уый тыххæй фехъусын кодтой оперативон штабы æмбырды. Амыдта йæ хицауады сæрдар Дзанайты Барис. Уæрæсейы фæлхасгæнджытæм цæстдарды управленийы амынддзинæдтæм гæсгæ, афæдзы райдиан коронавирусы ныхмæ цы арæнæвæрдтæ æрцыдысты нысангонд, уыдоны иу хай хъæуы сисын. Ныр QR-код нæ домдзысты фысымуæттæм æмæ туристон къабазы æндæр объекттæм цæугæйæ дæр. Æппæт ацы ивддзинæдтæ баст сты æртæ къуырийы дæргъы эпидемиологон уавæр кæй хуыздæр кæны, уыимæ. Ацы къуыри хæцгæ низ 37,3% къаддæр парахат кæны. Премьер ковидимæ баст домæнтæ фæлæмæгъдæр кæныны фæнд банымадта растыл. Йæ куыст фæрогдæр Тагъд медицинон æххуысы станцæйæн дæр, суткæйы дæргъы райстой 618 курдиаты æгас республикæйы. Уæрæсейы æнæниздзинадмæ цæстдарды управленийы бæрæггæнæнтæм гæсгæ, ныртæккæ республикæйы дзæбæхкæнæндæтты ис 450 адæймаджы. Ковид-пациенттæн рынчындæтты цы 774 бынæты снысан кодтой, уыдонæй 324 сты уæгъд. Уый у 42%. Сывæллæтты клиникон рынчындоны ис 32 пациенты, уыдонæй иу — реанимацийы. Æнæниздзинад хъахъхъæныныады министрадæй куыд фехъусын кодтой, афтæмæй ног къуырийæ Æрыдоны районы сæйраг рынчындон æмæ Республикон клиникон рынчындон ковид-пациентты нал исдзысты. Хъæугæ медицинон æххуыс сын кæндзысты Тагъд æххуысы клиникон рынчындоны. Ныртæккæ республикæйы скъолаты æмæ сывæллæтты рæвдауæндæтты карантины æхгæд кълæстæ æмæ къордтæ нæй. Дзанайты Барис бабар кодта, цæмæй Донецк æмæ Луганскы цæрджытæ кæм æрбынат кодтой, уым санитарон домæнтæм уа лæмбынæг цæстдард. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv