2021 азы Цæгат Ирыстоны паддзахадон æмæ муниципалон лæггæдтæ дарддæр ивдзысты электрон хуызмæ

Уæрæсейы президент Владимир Путин бахæс кодта 2023 азы 1 январы онг социалон ахадындзинад цы паддзахадон æмæ муниципалон лæггæдтæн ис, уыдон электрон хуызмæ ракæнын. Цæгат Ирыстоны дæр уый фæдыл ацы аз ахуырад, социалон æмæ медицинон къабæзты фæзындзæн ивддзинæдтæ. Информацион технологитæ æмæ бастдзинады регионалон управленийы январы кæронмæ хъуамæ бацæттæ кæной куысты сæрмагонд пълан. Медицинон лæггæдтæ райсынæн адæймаджы бахъæуы йæ гæххæттытимæ регистратурæмæ бацæуын. Уым дæр дзæвгар рæстæг арвиты. Стæй йæ бахъæуы цалдæр кусæнуатмæ рады фæлæууын. Уыдонæй та-иу кæм медицинон картæ фесæфт, кæм улæфæн рæстæгыл сæмбæлд адæймаг, кæм та æбæлгæ лæггæдтæ райсынæн тох кæнын бахъæуы. Ацы аз хъуыддаг аивдзæн. Медицинон кусæндæттæ хъуамæ рахизой документты электрон хуызы зилдухмæ. Нымæцон технологитимæ æнгомдæрæй æмдзу кæнын райдайдзæн социалон къабаз дæр. Кæд раздæр бирæтæ зонгæ дæр нæ кодтой, цавæр паддзахадон лæггæдтæ райсыны фадат сын ис, уæд ныр афтæ нал уыдзæн. Сæрмагонд порталы руаджы адæмæн хъусын кæндзысты, цавæр æххуыс æмæ субсидитæ сын æмбæлы, уый. Уыимæ ма, лæггад райсынæн курдиат дæттын нал хъæудзæн. Зæгъæм, сывæллоны рæвдауæндонмæ ныффыссынæн. Паддзахад æппæт хъæугæ гæххæттытæ бацæттæ кæндзæн. Стæй уæд адæймагмæ хъусынгæнинаг æрбацæудзæн. Хæстæгдæр 2 къуыримæ информацион технологитæ æмæ бастдзинады управленийы сбæрæг кæндзысты хуыздæр скъолатæ. Уыдон архайдзысты бындурæвæрæг проекты. Кусдзысты сæрмагонд ахуырадон программæтæм гæсгæ. Нымæцон технологитæ адæмы цард æнцондæр кæй кæнынц, уый дызæрдыккаг нæу. Фæлæ дзы алкæй бон æххæстæй пайда кæнын нæу. Уымæ гæсгæ, ацы аз ногæй управленийы хъæппæрисæй адæмæн сараздзысты ахуыртæ. Сæ фæрцы республикæйы цæрджыты нымæцон зонындзинæдтæ хъуамæ фæбæрзонддæр уой. Уый руаджы сæ бон уыдзæн нырыккон технологитæй æнæкъуылымпыйæ пайда кæнын. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv