Ирон театры 14-æм февралы равдисдзысты спектакль Уильям Шекспиры трагеди «Ромео и Джульеттæ»-мæ гæсг

14-æм февралмæ Цæгат Ирыстоны академион театр цæттæ кæны ног премьерæ. Уильям Шекспиры трагеди «Ромео и Джульеттæ»-йы хъайтарты нырыккон дугмæ рахæсдзæн курдиатджын режиссер Уалыты Гиви. «Ромео и Джульеттæ» иронау сдзырдтой Плиты Грисы тæлмацы фæрцы. Фæлтæрдджын актертимæ иумæ пьесæйы сæйраг фæлгонцтæ раргом кæндзысты Цæгат Ирыстоны паддзахадон университеты рауагъдонтæ. Уарзондзинады сæраппонд - мæлæт. Шекспир уарзт æмæ иузæрдиондзинады трагеди «Ромео æмæ Джульеттæ»-йы равдыста, æцæгæйдæр уарзондзинад мæлæтæй тыхджындæр кæй у. Спектакль йæ мидисмæ гæсгæ у традицион. Фæлæ курдиатджын режиссер, цы цаутæ дзы цæуы, уыдон рахаста ныры дугмæ. Æмæ равдыста йæхи цæстæнгас зындгонд уацмысмæ. Куыд зæгъы, афтæмæй дзы ис сидт дзыллæмæ. Уый фæдыл Уалыты Гиви спектаклы сарæзта тыхджын удыхъæды хицау хъайтартæ. Уыдон æй æвдисынц нырыккон фæсивæды æвзагыл. Сценæйыл цы цаутæ цæуы, уыдон зæрдæмæ бахъардзысты алы кары адæймагæн дæр. Артисттæ куыд зæгъынц, афтæмæй дзурынц æрмæст сæхи номæй нæ, фæлæ ма æгас æрыгон фæлтæры номæй. Сæхи кар у уацмысы хъайтарты кармæ хæстæг. Ромео - æрыгон актер Гуцаты Тамерлан Ирон театры сценæйыл сæйраг роль фыццаг хатт хъаздзæн. Джульеттæйы фæлгонц раргом кæндзæн Æгкацаты Аминæ. Сæ дыууæ дæр сты Цæгат Ирыстоны паддзахадон университеты аивæдты факультеты рауагъдонтæ. Хъазынц дзы сгуыхт артисттæ Цæллагты Сослан, Джанайты Эльбрус, Сугъаты Хъазыбег æмæ æндæртæ. Йæ аивадуарзджытæн ирон театр 14-æм февралы ногæй скæндзæн рæдау лæвар - премьерæ Шекспиры зындгонд трагедимæ гæсгæ. Ирон æвзагыл дæр, англисаг æмæ уырыссагау, йæ мидис у тыхджын. Уымæн æмæ йæ ратæлмац кодта нæ литературæйы курдиатджындæр адæймæгтæй иу, Плиты Грис. 2021-æм аз театр райдыдта премьерæтæй. Сæвæрдтой «Мæ усы мад» æмæ «Пæсæйы фæндон». Дарддæры фæндтæ дæр сты егъау. Уымæй уæлдай сæвæрдзысты Гарси́а Ло́ркайы пьесæ «Тугæйдзаг чындзæхсæв». Уымæ гæсгæ рауайдзæни афтæ, æмæ та ног театралон сезон хъæздыг уыдзæн национ, уырыссаг æмæ фæсарæйнаг классикæйæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv