Уæлдæр ахуыргæнæндæтты адæмон кæфтыты ансамбльты фестиваль цæуы Дзæуджыхъæуы

Уæлдæр ахуыргæнæндæтты адæмон кæфтыты ансамбльты фестиваль «Ирыстон» цæуы Дзæуджыхъæуы. Хъæлдзæг бæрæгбон сарæзтой Цæгат Ирыстоны паддзахадон университеты. Сæ арæхстдзинад сценæйыл равдыстой 150 архайæджы. Се 'хсæн Цæгат Ирыстон, Дагестан, Стъараполы крайы минæвæрттæ. Фестивалы сæйраг нысан - фæсивæды разæнгард кæнын национ традицитæ æмæ культурæ хъахъхъæнынмæ. Национ музейы æвæрæнтæ - фæсивæды цæстыты раз. Сарæзтой сын историон экскурси, радзырдтой сын ирон адæмы рагфыдæлты царды тыххæй. Музей фестивалы æппæт архайджыты зæрдæмæ дæр фæцыд. Цымыдисаг сæм фæкастысты, скифтæ æмæ алантæй цы дзаумæттæ баззад, уыдон. Фестивалы архайджыты `хсæн бирæ кадджын уазджытæ ис. Дунейы алы кæрæтты чи фæзылд, суанг уыдоны дæр музейы экспонаттæ сæхимæ æрбалвæстой. Фестивалы аразджытæ куыд фæнысан кодтой, афтæмæй йæ сæйраг нысан у студентты культурæ æмæ национ традицитæ хъахъхъæнынмæ разæнгард кæнын. Ахæм фембæлдтытæ уымæн ахъаз сты. Кæрæдзимæ æнгом кæнынц, адæмы цард чи рæсугъд кæны кудьтурæйы фæрцы, уыдоны. Фæстæдæр фестивалы уазджытæ абалц кодтой уазæгуаты ансамбль «Алан»-мæ. Фæсивæдæн ансамблы архайджытæ сарæзтой дæсныйад æвдисæн ахуыртæ. Уазджытæ федтой чызджыты рог уæнгты змæлд æмæ цæхæрцæст лæппуты къахфындзтыл кафт. Уазджытæ куыд загътой, афтæмæй ам сæ зæрдæты равзæрд алыхуызон рæсугъд æнкъарæнтæ. Афтæ сæм касти, цыма кæрæдзийы рагæй зонынц. Изæры сæ аивад æмæ культурæ равдыстой Цæгат Ирыстоны паддзахадон университеты концертон залы. 150 студентæй фылдæр Стъараполæй, Дагестан æмæ Цæгат Ирыстонæй адæмы рæгъмæ рахастой мидварны хæзнатæ. Рæдау лæвар - раст Ног азы хæдразмæ. Кафты бæрæгбон баззад æрыгон чызджытæ æмæ лæппуты зæрдæты. Фестиваль æрвылазон кæй хъуамæ уа, уыцы фæндон та сыл базыртæ базайын кодта. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv